嘩嘩嘩....嚇死我喇!!!!
每晚都會比3隻豬食少少番薯, 用嚟送眼仔supplement, 方便打開膠囊撈落去; 番薯甜甜哋可以蓋過D草藥味, 3隻豬唔抗拒!
每晚都係咁, 從未出過事, 但今晚就比豆b嚇死!
波波一向都官仔骨骨好滋油, 會慢慢食, 所以唔隔開佢哋, 佢最大壓力, 見其他食完行埋去, 實惡到死!
達達都食得好快, 好似去咗個搶食世界, 但都無豆b咁誇張, 遲D放低個糧兜都嘔口水, 仲要食得超快!
我已經分隔開佢哋, set咗好耐呢個措施, 唔想佢哋驚搶食有壓力, 亦想佢哋食慢D; 但咁做幫唔到豆b, 佢都係要極速清晒!
今晚都一樣, 一放低個糧兜, 豆b九秒九舂個頭埋去, 努力咁食....
無耐見佢離開個兜走開嚟, 猛咁跳!
我第一個衝入腦就係佢哽親喇, 即刻幫佢拍背, 再將佢放低, 呢隻為食豬仔又衝埋個糧兜想繼續食; 但都未食又走番出嚟, 仲喺地上打滾用前手猛撥個面, 眼都凸晒!
哎吔真係嚇到我震晒, 咁點辦?? 即刻將佢倒轉拍, 又唔得; 再幫佢按壓橫隔膜, 都唔掂, 死喇!
叫自己冷靜落嚟, 望真吓佢, 佢個樣係好唔舒服, 瞪大對眼猛撥個面豬仔!
突然諗起姐姐狗狗之前發生嘅事, 又係情況雷同, 佢即刻帶咗狗狗睇獸醫, 又驗血又照x-ray都唔知係咩事, 最後打開狗狗個口, 原來有粒狗糧藏咗喺脷底, 整唔到出嚟!
我快手打開豆b個口檢查, 脷底無嘢; 再望喉嚨位, 唔見有嘢黐住, 叫老公拎個電筒嚟, 再檢查仔細!
一望....見到D番薯好似裝修批擋, 成幅咁漿滿個上顎, 壓死晒.....:0
即刻同佢撩番出嚟 , 隻豬笑喇;下次要用水將D番薯整濕D!!
好可怕嘅經歷, 簡直係十級驚嚇, 如果唔係我記起姐姐呢件事, 實撲咗出去搵獸醫!
當日傾談間大家都得啖笑, 笑話一粒狗糧就攪到咁大件事, 又要做一連串化驗, 使咗冤枉錢又嚇餐飽, 仲累狗狗苦過弟弟啦 😉
估唔到呢個經歷今日幫到我!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
