BeBe, 今日係你嘅忌辰, 離開咗咁耐, 有無掛住爸爸、媽媽, 仲有最鍚你嘅姐姐呀?
記得第一日接你番嚟, 你跑過嚟舔我, 嚇得當時怕狗狗嘅我呱呱大叫, 即刻跳上梳化; 又記起年紀細細嘅阿女即刻走過嚟攬住你, 猛叫唔怕唔怕, 其實你有怕咩? 當時你係頑皮嘅小精怪, 見你哋玩到嘻嘻哈哈, 你仲頑皮咁用細小嘅牙齒輕咬阿女, 怕嘅係媽媽啊!
 |
| 當年見到呢個公仔就即刻買, 因為完全係阿女同BeBe嘅寫照啊! |
一直阿女都係依賴媽媽, 直到你嘅到來, 小小人仔負上重責; 當然啦, 媽媽怕狗嘛!
準備好食物要阿女拎去比你, 抹嘴仔抹手仔呢D全係佢做啦; 本來, 我都仲幫緊佢做呢D清潔㗎, 你嘅到來, 小小人仔迅速長大, 不但學識照顧BeBe你, 仲學識照顧自己啦 :)
見到阿女日日與你為伴, 形影不離我真係有D妒忌㗎, 原本阿女心目中最重要嘅係媽媽, 但你已經好似取代咗我嘅位置, 每日都聽到阿女BeBe, BeBe咁叫, 再唔係分分秒秒都叫住媽媽; 其實我真係好感謝你嘅分擔, 比阿女每分每秒纏住好攰㗎, 哈哈!
睇住你哋呢對小孩小狗相處融洽愉快, 我都漸漸被你溶化喇, 係幾時開始我加入咗你哋嘅小圈子? 我都唔記得啦, 只記得我哋過住好開心嘅日子, 當時對養狗咩都唔識嘅我無有怕, 帶住你哋通處跑啦！
BeBe你好少病, 我哋過咗好多年無憂無慮嘅好日子, 但你漸漸老喇!
你嘅病來勢兇兇, 一下間就迅速惡化, 心臟病又抽筋, 發病時真係好可怕; 仍然係阿女幫你做清潔工作, 抽筋後嘅嘔吐物都係佢善後啦, 我真係佩服佢可以護住抽筋中嘅你輕輕安慰, 我已經嚇到震晒喇!
然後, 只過咗短短一年, 你要走喇!
BeBe你一定係好攰喇, 其實見你最後咁辛苦都想過幫你一把, 但係 - 我哋唔捨得, 做唔到啊 :'(
到今日我都唔知有無做錯, 唯一無遺憾嘅係你走嘅時候媽媽陪喺你身邊, 阿女攬住你啦!
當然, BeBe你陪伴住阿女長大, 你哋嗰種親蜜我好理解, 咁多年來, 偶然仲會聽到阿女講BeBe你, 話你鍾意好似乳豬仔咁爬低瞓覺 :)
時間過得好快, 但完全無將你嘅形像變模糊, 每想起你就好似睇緊立體電影, 一幕幕喺腦中播送, 非常生動, 相信阿女都一定都唔會忘記你嘅種種!
BeBe你好好生活喺彩虹橋上, 總有一日, 我哋會重逢!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
