 |
| 相片連結 |
每日都好似好忙, 都係環繞住3隻豬仔啦 :)
 |
| D毛真係幾好喎！ |
雖然見毛根漸退去黑色素, 但都唔敢開心得太早, 希望越大失望更難承受, 但就好享受呢個變化嘅過程; 見到佢毛質開始有番彈性, 現階段嘅成果我已經好享受, 將來係點無人可以預告, 總算學識享受過程中嘅得著, 唔再苦苦追求結局要有幾好幾好!
佢腰椎問題都緩和落嚟, 行得比以前好, 當然我有keep同佢做物理治療, 艾炙, 場效應同紅外線輪住咁做, 但無以前比大家咁大壓力, set住個時間表咁辛苦!
達達好享受每個復康治療, 每次都好合作, 我感覺佢係好舒服, 每晚我都會同佢做穴位按摩 (都係睇住張穴位圖自學咋), 見到佢心情係比以前好!
雖然間中仍見佢有輕微腳震, 但對佢影響唔太大, 我唔再咁哽心啦, 要百份百完美係無可能!
豆b情況都唔壞, 我好難相信佢身體出事啦, 雖然血檢係有偏差, 但我傾向相信係藥物反應喇; 隻豬大小便胃口精神都正常, 連呼吸都好咗, 呢段期間我每日用生理鹽水比佢聞氣, 條脷仔嘅顏色都正常番喇!
希望下次去覆驗, 血檢報告會如我所願啦！
仍有幫佢做物理治療,希望keep住頸椎唔好變壞, 但呢隻豬同達達相反,兩頭咁轉要佢定一陣都好難, 唔出動零食誘惑唔使做喇!
波波呢兩日氣管有D差, 聽到佢時有卡卡聲好似有D咳呀, 我都比佢聞氣, 唔想動不動出動氣管藥喇. 聞咗兩日已經好番, 我發覺用生理鹽水比普通過濾水效用更大, 出嘅氣都多D㗎!
波波都有做物理治療啦, 但只可做短時間, 我都只係想幫佢保養住條腰仔, 唔勉強令佢唔開心啦, 佢一唔耐煩我即刻停喇 :)
呢段期間算係平靜渡過, 有空檔時間就做手功啦, 下個月就係3隻豬8歲生日喇!
好彩我乜都要早早準備, 真係比呢D手功害慘, 本來做好咗D手功都上好色喇, 為咗效果更靚, 唔想用光油整到件手功令立立, 今次想用啞光掃面做保護啦!
本來啞光漆就唔易買, 好難先搵到有貨啦, 多謝A報料先搵到一兩間; 但可惜係我用水彩油紙黏土, 呢隻啞油一掃D水彩溶晒, 變晒花面貓 :(
以前我用嘅光油無出過呢種意外, 我無咗呢種危機意識, 無諗顏料方面嘅問題啊!
好彩仲有時間, 算係為時未晚 ;P
唯有再重做死咗嗰部份啦, 今次要搵吓有無油性嘅光油, 唔會溶水彩喇!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
