真係該死, 又再一次忘記咗叻叻離開嘅日子 :'(
近排魂頭轉向, 比波波嘅病症攪到我無日安寧, 日日忙住為呢隻豬做物理治療, 咁叻叻嘅忌辰, 又過得無聲無息 :(
我唔係唔掛住生活喺彩虹橋上嘅五寶, 相反最近仲請咗一個店家, 好濕碎咁要求佢為我嘅寶貝做一件事!
事緣我見到呢個店家, 為訂購佢店內床仔嘅毛孩, 逐一繡上名牌, 我覺得好靚好特別, 我都希望我所有嘅寶貝都有縫上自己名牌嘅睡床!
5寶嘅床就係承放佢哋骨灰嘅絲絨袋, 我希望每個絲絨袋都有佢哋自己嘅名字!
點可以平白接受呢份好意, 可以為我做已經好好 :)
https://www.facebook.com/145858865611241/photos/a.197747423755718.1073741837.145858865611241/384319871765138/?type=1&theater
當我一收到呢幾個名牌, 唔使講已經第一時間為5寶縫好:)
Mi話佢無勇氣打開骨灰盅蓋, 相反我就數月如常, 打開為佢哋換上新嘅防潮珠, 會撫摸佢哋嘅骨灰袋!
今日喺FB睇到好一大段有關動物是否有靈魂嘅文章, 我唔想評論內容, 畢竟任何事物都會有見解唔同, 總知但求自己心安啦!
因為睇到呢段文章, 就同Mi傾起過世嘅寶貝, 一幕幕往事就好似將我拉返到現場一樣; 之後, 突然就記起...叻叻嘅忌辰! 上星期日係叻叻嘅忌辰, 呢個無心肝嘅媽媽, 真係愧對叻叻, 仲口口聲聲話有幾鍚幾鍚!
叻叻一向最懂事, 我信佢唔會怪媽媽, 亦會保佑波波呢個細佬早日康復, 平平安安, 今次我忙於照顧波波佢一定會原諒!
寶貝叻叻, 你一定要記住, 你一直係媽媽嘅最愛!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
