 |
| 相片連結 |
天氣持續咁熱, 3隻豬都無得出外, 中暑唔講得笑!
其實"有時"自己落街都唔覺得好好好熱, 碰啱有風嘅時候好有衝動帶佢地落去遊吓花園, 但一諗到冷氣間同外面溫差始終大, 就唔敢行動咁貿然; 諗起上次嗰隻中暑而亡嘅雪橇, 佢主人就出過post告誡, 氣溫相差太大係佢狗狗中暑嘅關鍵!
算啦唔出去行就算, 還幸有3隻豬互相作伴, 雖然會吵吵鬧鬧打吓交, 只要唔受傷就算; 所以我都要加入佢哋嘅戰團, 一見玩得過份激烈, 就要出手將玩耍中斷!
見到波波可以同豆b追逐個心好甜, 即係佢嘅病情有進展, 不過都唔敢比佢哋玩得咁癲, 隻豬豆玩起上嚟好痴線 :)
實在好嚮往呢D平靜嘅日子, 閒來無事同3隻豬勤力D做物理治療, 如果工人姐姐唔係成日激到我吊頸, 我真係快活過神仙!
今日個遊魂姐姐又嚟料, 將我叫手洗嘅真絲放埋同深色牛仔褲一齊用機洗, 結果係幾慘都可以預見 :'(
一見到件白色真絲衫染到一噠噠, 真係激到出煙!
我拎住件衫面色一沉, 佢反應比我仲大, 喊住話homesick要resign, 佢話唔可以集中精神, 唔記得D衫洗時要分開顏色深淺!
所有delicate嘅衫都係要手洗㗎啦, 手洗機洗要分開, 仲要留心顏色深淺, 我有講㗎!
佢話好怕洗衫熨衫, 點都唔識掌握, 要整壞都無辦法!
依家我已經自己熨衫, 連洗衫都話怕? 咁唔使做好嗎?
佢話自己已經try the best好小心, 好小心但唔聽指引唔聽教?
姐姐你究竟知唔知咩叫domestic helper? 知唔知自己嘅職責? 有無上過training course㗎? 咩有得揀唔做洗衫熨衫?
清潔家居就將我嘅收藏品打爛, 洗衫又染到一噠噠, 又唔識熨衫; 煮食又時鹹時淡, 又話最怕呢一瓣; 咁我請你返嚟做咩呀? 最慘聽完又唔受教!
 |
| 自問對佢唔差㗎, 但有用嗎? |
話佢好差又唔係勁差, 但就一定係無心做好喇, 已經唔係第一次, 每次做錯事就話要歸家, 最討厭呢句啦!
我體諒離鄉別井嘅苦, 所以整爛嘢一向唔會扣糧, 一直叫住下次要小心呀!
但一次, 兩次, 三次將"我quit"掛喺口唇邊, 唔知講真定講假, 究竟有無心做好㗎? 我唔可以一直咁容忍啦!
我請個姐姐係幫輕家務, 唔係請個情緒病患嚟輔導, 每次衰咗就話homesick, 用眼淚、用走嚟大我, 等我就範, 皆因知我怕煩!
但一句homesick唔係免死金牌, 要我將忍耐無限擴大!
容忍係有限, 一而再, 再而三; OK啦, 要走嘛, 我成全閣下, 佢係異族一定未聽過"狼來了"呢個故事喇!
然後即時叫佢比辭職信, 唔想再煩, 但佢又即刻喊晒求比多次機會, 知道今次玩得過咗火喇!
姐姐心腸唔壞, 只係做慣太太, 佢履歷係話有經驗, 實質喺菲國係無做嘢㗎!
比D時間再磨合, 不過如果再一次用quit嚟要脅, 就請便喇!
我唔介意教, 但要有心留低做先得啦, 整日諗住要歸家, 真係難集中精神嘛, 而且咁係不負責任嘅做法, 對我唔公平啦!
我只求3隻豬健康無損, 可以過安安樂樂嘅生活, 姐姐你有心做就唔好再咁玩, 唔好再挑戰我EQ喇!
