 |
| 相片連結 |
終於為3隻豬仔鋪好地墊, 我揀嘅係絨面, 比膠面更著力一定唔會跣; 都諗過萬一佢哋曳曳會尿尿, 所以選擇拼駁嘅地墊, 已經買多咗後備, 萬一真係整污糟咗, 都可以逐塊換出嚟洗, 好方便!
希望鋪咗一個大D嘅範圍, 達達可以行多D, 強化後腿肌肉, 鍛鍊多D腳震會變少; 豆b關節都差, 近來見佢有跣腳, 變得懶咗好少行, 呢D都係老化嘅徵兆, 要正視喇; 至於波波, 一下間變得咁差, 腰又有事頸又骨刺, 仲要側住個身行, 點可以唔幫佢一把!
如果3隻豬都因為筋骨勞損唔想行, 活動能力只會越嚟越差, 去到肌肉萎縮就會成日瞓覺, 咁會加速內臟衰弱, 再唔行吓點得呀? 唔到我唔的起心肝諗辦法!
雖然為咗達達唔敢行, 我一直都有鋪地氈幫吓, 但範圍唔大; 達達去到氈嘅盡頭就唔會再行, 或者會暴衝, 咁扯傷仲慘, 唯有改動吓個鋪排諗辦法!
鋪好晒地墊後放波波出嚟行一round啦, 有咗地墊卸力可以比佢鬆一吓, 困籠太耐佢開始唔耐煩, 動不動都會吠一餐!
達達對任何新事物都抱住懷疑嘅態度, 只敢喺圍欄內張望, 用隻前手踏踏試吓啦!
以為豆b無有怕, 但原來佢都有D驚㗎, 3隻豬睇落都有D唔習慣, 又要比D時間!
還好唔需要太耐達達就敢慢慢行, 不過好似當初出街咁, 姿勢好似隻曱甴, 將個身座低晒 :)
波波呢, 行咗一陣就唔記得自己有事喇, 又跑又撲達達, 怕咗佢咁激又整傷, 無得再行!
豆b呢, 明顯行得穩咗, 行咗一陣就伏低瞓覺; 可能今日浸完微泡浴又剪毛, 佢攰啦!
3隻豬年紀漸大, 希望多方面保養, 未來嘅路唔會太難行; 但願3隻豬唔好再呢度痛嗰度痛喇, 痛真係好慘!
但求可以開開心心過得好, 時間長短唔諗喇!
反正要離開, 幾時都係咁唔捨得啦, 不如好好珍惜相聚嘅時間!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
