 |
| 相片連結 |
"失去實在太易, 擁有並非必然! 寶貝 媽媽一定一定好好 好好愛錫你地!"
今日喺FB睇到呢一句, 我眼眶突然一熱, 有D激動有D唏噓!
從波波今次嘅不適, 我有好多感慨, 以前見佢用後腳挍痕, 會嫌佢挍身挍勢; 舉腳尿尿, 話佢整到牆邊都有尿; 抖動身體, 就話D毛髮通屋飄, 呢一切都唔係咁like啦; 但原來當失去時, 你會好懷念呢一切一切!
波波今次經歷過企唔穩, 唔可以再舉腳尿尿, 亦唔可以再挍痕; 見佢嘗試提起後腳想挍耳仔, 然後頹然放下, 我好傷心, 感覺到佢失去呢D活動能力好唔開心!
原來呢幾個咁唔優雅嘅動作, 狗狗係需要一定嘅體力同平衡感, 當有病、年紀老大, 要做都無可能!
近日好勤力幫波波做復康治療, 當見到佢可以再次舉腳尿尿, 挍耳仔、轉圈、甩動毛毛, 我真係好開心; 已經幾日無聽到佢因為心急開餐大叫, 今日聽到佢喺房大聲叫, 我開心到快快手捧餐比佢, 有D手忙腳亂!
幸福唔係必然, 一D最平凡嘅動作, 有日失去咗能力, 任你點努力都未必可以有改善, 毛孩曾經頑皮搗亂, 四圍舉腳尿尿, 令你疲於奔命咁清潔, 呢種日子, 原來你會懷念!
今後3隻豬即使做咗任何搗亂, 我會用心欣賞會釋然, 相處嘅日子會愈來愈少, 所有曳曳嘅行為, 日後會變為鮮明嘅紀念!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
