一早餵完3隻豬, 剛返入房想再瞓一陣間, 就比工人姐姐急促敲門聲驚嚇; 然後...就見到最唔想見到嘅事實, "BROKE"佢手中拎住我心愛嘅相架!
我一望之下, 個感覺唔識形容, 好似有好多嘢一下衝咗上腦, 唔識表達嗰種激動, 好嬲、好心痛!!!!!!!
呢個係阿女好多年前送嘅生日禮物, 仲記得收到當時好感動!
我自己曾經喺time square嘅禮品店見過呢個相架, 但一個咁嘅相架要幾佰蚊, 當年嘅我唔捨得買!
時勢唔同, 諗法有別, 今時今日如果用少少零錢可以令自己開心, 梗係買啦, 呢幾年心態真係有咗改變!
難得阿女有呢份心意, 佢知道媽媽鍾意呢D, 一直留意!
佢用佢嘅零用錢買咗落嚟, 喺當年我嘅生日, 送比我做生日禮物!
呢個相架我超級鍾意, 仲有阿女嗰份情意, 點可以形容於文字?
當年我仲返緊工, 覺得搵錢真係唔容易, 喺唔會、亦認為唔值用咁嘅錢去買一個玩意!
就比姐姐一個'BROKE' 字, 咁簡單嘅交代, 我就要將一切吞咗落去!
呢個相架我真係好鍾意, 好鍾意……
點解小心係咁難? 咁多年來又唔見我會將心愛嘅物品打爛? 無心工作時時將物件打爛, 只係輕輕鬆鬆咁講句sorry?
唔通請個好工人依家真係如天荒夜談? 我真係要考慮自己做番?
簡直唔想再見佢個様, 急急轉返入房間, 上網搜尋, 睇吓有無可能買得返!
但過咗咁多年, 係無啦; 即使可以買番, 都唔會再係當年情, 當年事......心痛如絞!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
