希望好快好番 (w/album)

相片連結

依家每日最開心, 最想做嘅兩件事, 就係打理達達豬同埋出去行街街 :)
每日同隻豬女梳毛, 都會輕輕撫摸佢新生嘅毛髮, 好柔軟好滑, 仲feel到係好有韌力, 即使輕輕拉扯都唔會甩出嚟, 真係唔同之前咁架, 不過, 佢頭毛同前手反而差咗, 可能未換得切啦!

漫長迂廻嘅路 - BSD (下)

歸納咗各地朋友成功幫到有BSD嘅松松, 大部份方法都係搽油, 等油份停留皮膚4小時以上, 亦可以過夜, 跟住就沖洗將油份洗清!
其中用嘅油類都好廣泛, 有用礦物油、椰子油、嬰兒油、鴯鶓油等等; 而洗毛水都有好多款, 有用松焦油洗毛水, 我用緊嘅DERMagic shampoo及emu oil shampoo等等, 甚至有人用上洗潔精:)

漫長迂廻嘅路 - BSD (上)

今日再同大家分享達達嘅脫毛症, 好長篇 :)
經過咗無數挫折、失敗、今日見到有少少成績喇, 終於見到達達豬之前光禿禿嘅皮膚, 生出少少好幼細嘅新毛毛;感覺好似以前換緊BB毛咁, 一路褪下嗰D唔健康嘅毛髮, 換上咗新毛, 我諗要換好晒去到正常嘅狀態, 仲有一條遙遠嘅路, 進展緩慢但總算每日都有進步啦!

On-Leash Aggression - 轉貼

今日睇到呢篇POST, 原來又真係唔怪得晒我波波豬嘅, 基本上佢如果唔上繩, 遇到狗狗都唔會亂吠!

我之前同松友聚會,十幾隻狗狗走嚟走去, 波波都唔會吠! 但依家出去見到狗狗就發癲, 真係有可能係因為上咗繩, 但喺外面行街放繩係無可能, 唯有避開其他狗狗為上算!

希望有適當安全地點, 先比波波進行佢嘅社交啦!

欲速不達

今日又洗咗白白:)

今日想講吓達達食藥同補充品嘅問題, 達達自從驗出甲狀腺T4低下, 就開始食藥喇, 一直keep住食咗兩年, 有定期驗血, 除咗驗甲狀腺外, 都每年做一次blood profile嘅, 慶幸甩毛外, 身體無出乜嘢大問題!

互相作伴 (w/album)

達達變咗大眼妹

達達豬又開始食埋黑酵母喇, 應該會增強佢免疫系統啦, 呢隻補充品一直口碑唔錯, 但大都係有癌病嘅狗狗先會服用, 我無諗過會要用上佢啦; 不過TT用出成績, 見到有新生毛髮, 我都不防試吓, 睇成份都係多醣體類, 都係有益健康啦!

大安旨意 (w/album)

相片連結

今日又同3隻豬去街街, 其實好怕呢D天氣, 潮潮濕濕咁, 惹到牛蜱就死; 我都已經唔比佢哋行草地, 見到人家狗狗喺草地上跑到飛起, 我真係羨慕到死, 但我真係無勇氣!

有人話避得幾多, 牛蜱唔係只生存於草地, 根本行到邊度都有機會惹到, 真係好煩; 但草地始終係高危地帶, 避得幾多得幾多啦, 我都知咁係好逃避, 但唔去草地損失都唔係咁大嗟, 只要帶佢哋出去行行跑跑, 見吓外面嘅世界, 佢哋一樣咁開心啦!

加入黑酵母 - AUREO

前胸毛毛仍然稀薄，但都比之前好咗！

達達食咗兩個幾月神奇粉喇, 再加上用埋神奇水整個系列, 毛質毛色係有改善, 背上褪晒黑毛; 但就睇到頭毛稀疏咗, 唔知係咪換緊新毛, 因為見到背部嘅毛就越嚟越好, 但膊位以上同前胸, 都係好稀疏, 都仲係見到肉肉, 生長新毛進度仍好慢！
不過見到有進步, 都好開心喇 :D

論盡工人 - (9)

工人姐姐嚟咗3星期多喇, 總算有好嘅改善, 我間中都可以透吓氣, 同幾隻豬仔去吓街街啦!
自從同佢講咗做得好會有bonus, 佢真係加咗把勁, 清潔方面明顯用心咗, 做得好乾淨; 可能錢真係對佢好重要, 所以有獎賞真係work,如果付出多少少可以push到佢肯用心去做, 咁都不防, 不過煮食方面仍待磨練!

情人節2013 (w/album)

相片連結

今日係情人節, 先祝大家甜甜蜜蜜, 情人節快樂呀!
舊年情人節post咗波波同達達嘅一輯結婚相, 朋友A提議同佢哋影埋中國服, 都好喎, 立刻物識靚衫! 
多謝A同我搵到咁靚嘅中國禮服仲幫我買埋, 本來諗住買好衫留待今日同佢哋影嘅, 但見到達達毛毛好似越嚟越唔妥, 都係影咗先啦!

蛇年公仔

年初三, 外面好熱鬧, 喺度舞獅!
幾隻豬聽到咁大聲"茶篤撐", 瘋狂咁吠起上嚟, 唔使諗我都唔會同佢哋出去!
雖然係假期, 但明顯街上都好多人, 行嚟行去, 到處都有新春拜年嘅人仕, 小朋友比平日多咗, 我更加唔敢同佢哋出去, 唔想波波見到小朋友又狂吠, 費事比人眼厲厲啦, 更唔想嚇親達達豬!

同大家拜年（w/album)

波波福星高照，一定會好快好番晒

恭喜恭喜!!　 
今日年初二, 到今日先有心情正正經經同大家拜個年; 祝願快樂與你哋緊緊相隨, 煩惱低頭悄悄走掉, 健康吉祥對你哋關照, 幸福永遠對你哋微笑!

新年流流咁嚟玩

踏入大年初一, 先同大家拜年, 乜都唔講, 最緊要都一定同大家講句，恭祝大家身體健康!

今晚又比波波嚇到我好似癲婆, 事緣我哋一家食晚飯時候, 阿女見到波波好似好攰, 問我佢有無唔妥; 我本來都無覺有咩特別, 每晚我食飯佢都係番床仔瞓住等我; 但當我食完飯就發覺有問題, 平時我一放低飯碗, 佢會立刻跑過嚟要我抱抱, 今晚我叫佢都唔郁!

第三次療程

希望蛇年帶比達達好運, 會長出新毛毛啦!

今日又同達達沖涼, 幾忙都要抽出時間; 今次係進行搽油後沖涼嘅第三次療程!

又唔可已話做咗呢一切全無改善, 明顯佢皮膚係好咗, 黑色素沉澱少咗, 背部嘅毛毛都無乜黑色先啦; 但都係唔覺有新毛長出, 無毛嘅地方仍無改善, 毛髮仍然好薄; 但背部嘅毛毛無論毛色毛質, 改變係顯而易見; 好明顯感覺到嗰D毛毛係有生命有光澤, 希望蛇年有大躍進, 見到有更多改善啦!

論盡工人 - (8)

個心都跟住個公仔碎埋　:(

年近歲晚換工人姐姐真係慘, 仲要換個乜都唔識, 一日到晚MAM到我暈, 無錯我有話唔明要問, 但無諗過係咁!

琴日同3隻豬去完街,番去用毛巾同佢哋抹腳仔, 跟住放低咗條毛巾帶佢哋去飲水啦; 姐姐拎住條毛巾問我要放番邊處, 見到條毛巾一噠噠黑色, 梗係拎去洗啦, 咁都要問, 我就快C得!
從無請過工人好似呢個咁, 要我由朝做到晚 :'(

表現誇張(w/album)

相片連結

忙,忙. 忙! 年近歲晚換工人仲忙上加忙, 都唔知點算好!
今日將要做嘅嘢放低, 一於同3隻豬仔出去, 無可能為咗教工人姐姐, 而將3隻心肝開心嘅時刻省却咗去!

同工人姐姐一路行一路講, 叫佢幫吓眼, 如果見到有放繩狗狗, 要同我講聲; 我話唔係要做比較, 但舊姐姐好錫我3隻豬仔, 見到放繩狗佢都會緊張; 呢個新姐姐一聽我咁講, 表現頗誇張, 我感覺佢唔似舊姐姐嗰種出自內心嘅反應, 但佢肯跟我意思, 肯做比我睇, 我都ok!

媽媽學蒸糕(w/album)

相片連結

過年過節我都會訂購賀節食品比D豬仔, 今年就忙到頭都暈, 係見過FB有出過post, 睇到就快有應節食品訂購, 想等吓比較吓邊間最好, 但一轉頭就忙到唔記得, 咁就過咗訂購deadline; 我有send過email去問, 但都無覆我 :(

唯有梗著頭皮, 上網搵食譜, 去做我生平第一次嘅蒸糕; 好彩都唔算有難度, D豬仔又唔會挑戰我手藝唔好, 就為佢哋蒸番底愛心糕啦!

蛇年狗狗賀年糕點

年年有餘,'紅'運當頭

草本提升免疫素 - Dr.Harvey's E-MUNE BOOST

我一直都本住同一個做法, 豬仔食嘅一切補充品, 一段時間後就會轉吓, 對twins食開嘅supplement都食到七七八八喇, 係時候做吓搜查!

蛇年第一炮 (w/album)

相片連結

今日工人姐姐放假, 呢個姐姐話明要放星期日, 是旦啦, 鬼叫我請工人唔容易, D姐姐一聽見有3隻狗狗, 仲要僱主無番工, 都耍手擰頭喇!

本來無咗姐姐幫手做家務, 以前係會唔習慣, 雖然係一日半日, 但懶慣嘛, 要自己吸塵清潔覺得好煩; 但人適應力真係好強, 自從新姐姐嚟咗, 我要一日忙到晚, 嗰種勞累唔止肉體, 精神上忙到好殘!
唔怪得好多人寧願忍氣吞聲, 去種大工人個膽, 事實上從頭開始教, 真係好慘 :'(

要叫救命喇 (w/album)

相片連結

琴日同咗達達沖涼, 今日輪到一對twins喇, 都少少修吓毛毛啦! 唔係professional就真係無得扮, 明明剪嗰時都唔覺咁差, 一影相就露晒底, 不過都算數喇, 佢地咁唔合作, 再剪都係咁差啦!

一次過攪兩隻都好攰, 仲要教姐姐做嘢, 真係好慘; 姐姐真係乜都唔識做架, 唔好話煮啦, 連切個瓜削塊皮都要教!   
最慘依家日日要我煮, 佢話willing to learn, 但見佢雞手鴨腳, 唔出手都唔使食啦! 今日叫佢捧碗湯出嚟, 未拎起就全碗打瀉晒, 差D連個煲都跌埋 :(
天啊! 呢種日子要過渡幾耐呀, 救命!!

達達洗白白(w/album)

相片連結

呢幾日都好暖, 最適合同3隻豬沖涼, 不過近日教工人覺得好攰, 無勇氣一次過同3隻沖晒; 依家同達達豬沖涼要用好多時間, 因為沖涼前一晚我要同佢厚厚咁搽emu oil, 要全部沖洗乾淨要比較耐, 又要慢慢搓走佢皮膚嘅黑色素, 又要氹住隻豬怕佢唔耐煩, 都唔係講玩!