 |
| 相片連結 |
琴日同達達豬沖涼修毛, 用咗唔少時間, 無本事再做埋對twins, 留番今日再博殺再做 :)
今早餵完早餐, 隔兩小時後就開始幫波波沖涼修毛, 剛做好隻豬仔, 一轉眼又到佢哋食晏時間; 餵完午餐應該輪到豆b, 不過食飽唔適合將佢哋反來覆去咁攪, 雖然話胃反轉呢種症狀多數發生喺大型狗身上, 但都怕影響到消化困難, 都係要再等時間！
 |
| 豆b浸浴算係好乖好定 |
兩小時後開始做隻敏感豬, 隻豬豆嘅皮膚, 氣管, 鼻仔, 數得出嘅都敏感一餐; 今日要幫佢做個蘋果醋浸身, 要浸起碼5分鐘時間, 好彩豆b好合作好乖, 做呢個浸浴無困難; 以前豆b皮膚好紅, 近年已有改善, 只要無接觸到致敏源頭, 皮膚再無紅點喇, 不過佢愛抓痕嘅習慣就無得好番:(
豆b沖完涼又到佢哋晚餐時間, 匆匆忙忙又要餵晚飯, 等工人姐姐清潔好洗手間, 又到自己清潔時間; 每次同佢哋美容都攪到我成身毛毛, 身水身汗, 真係一件苦差, 不過為確保佢哋安全, 就辛苦都唔會計較!
 |
| 真係無妄之災，心痛！ |
早前網友隻北京, 就係比無良美容店害慘, 點會諗到去沖涼美容, 會攪到要做手術咁交關; 網友發覺狗狗頸部有4吋長嘅傷痕, 急忙帶去比獸醫檢查, 估計被勒頸6小時以上, 頸部肌肉已壞死, 要立刻切除爛肉, 最心痛係有機會肌肉無法重生!
咁耐以來聽過太多因美容發生嘅不幸事件, 令我好擔心; 以前我帶佢哋出去美容, 一定係相熟嘅店舖, 亦會指定人選, 但我都係唔敢離開半步; 雖然我信任美容姐姐唔會傷害佢哋, 但放咗上美容檯難保有機會行開行埋, 我喺網上睇過有美容店因咁都跌死咗一隻貴婦!
我識嘅朋友中有試過被吊死一隻八哥, 今次就要切除肌肉, 出去美容分分鐘連命都無; 唔識嘅就更層出不窮啦, 睇過有剪斷舌頭, 又有掌摑撞檯傷及眼球要手術取走隻眼....真係太恐怖!
無愛心何必要經營寵物相關嘅行業呢? 可惜無法為毛小孩討回公道, 又無法例重罰呢D無良店舖!
如果唔係100%安全熟識嘅美容師, 可以考慮揾上門嘅嚟做, 當然都係自己一手一腳做最好!
全日時間就好似用嚟沖涼同餵餐, 整日團團轉, 沖完涼放佢哋入圍欄影番幾張相, 咁一日時間就無; 3隻豬仔今日無得去街, 睇吓晚飯後有無mood落平台逛逛啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
