 |
| 相片連結 |
呢幾日同3隻豬仔行街街, 無得揀地點, 邊度有風就去邊度, 涼快最緊要, 中暑唔係講笑!
有時天氣真係太熱, 就唯有落平台行一轉, 見到無人就偷雞行吓跑10分鐘, 有人就坐車仔遊花園!
一般平台都幾好風, 係無選擇中嘅最佳選擇, 要出去就唯有將要求降低, 唔係就只有留喺屋企開空調!
傍晚有風就行吓舊路線, 雖然都係馬路邊, 但到底無咁多大車行, 空氣無咁污染; 新地點真係為咗同波波避開狗狗, 先勉強行一轉啦!
以為同朋友仔約會咗3次, 波波都無撲過無吠過, 應該有好轉, 但同佢上咗繩見到狗狗都一樣係無改變 :(
咁情況真係頭痛, 佢真係有Barrier Frustration, 唔上繩就ok, 一上繩就發癲!
我唔可以任佢見親狗狗就吠, 呢個係壓力來源, 咁落去情緒點會有好轉; 試過猛比零食做訓練, 又試過做減敏, 但功力唔夠唔成功, 咁可以點? 唯有又用斬腳指避沙蟲嘅方法, 將trigger移除, 見親有狗就上番車, 9秒9回轉啦 :(
達達豬出番一身毛毛, 我怕佢咁行會好熱, 但我唔敢亦唔會同佢剪短; 豆b明顯一出去就氣喘, 比佢行5分鐘就算, 天氣咁熱佢哋咁細, 離地下咁近距離, 太熱落地行真係可免則免, 唔行就算喇!
同3隻豬出去行一轉真係難, 好難搵適合地點, 要無大狗, 可以放繩, 唔會走失仲要近便, 最重要嘅係安全; 除咗約會朋友仔, 都唔知點算 :(
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
