工人姐姐放狗

琴晚試試晚飯前出去行, 但結論係唔可行嘅, 好多狗狗; 我拖住波波左閃右避, 不停兜來兜去,   一見到放繩狗就更家緊張, 咁行法唔得, 好攰!

反而達達無大問題, 不過就無同朋友仔約會咁開心喇, 上住繩就淨係好專心咁向前行, 唔敢分心其他; 但同朋友仔約會嘅時間, 佢比較有自信, 亦好獨立, 鍾意去邊都無問題, 有時都行得幾遠㗎!
喺一個安全嘅地點都盡量比佢哋自由, 所以一定要帶埋工人姐姐幫手, 如果佢哋向左走向右走, 我就同姐姐兵分兩路跟住佢哋啦！
 

達達行完就到豆b, 依個時間仲多狗, 可能大家都爭取晚飯前行吓啦; 豆b行一陣就氣喘喇, 都係時間返家, 今晚都係較準晚飯時間出動啦!
今日同3隻豬沖涼, 等佢哋休息夠今晚食完飯出動喇!

 

琴晚同3隻豬行街, 一開始就見到個工人姐姐拖住狗狗坐喺度, 放個手機喺腿上係咁撳, 完全無意圖帶狗狗行; 我同3隻豬經過佢身邊好多次, 佢完全沉醉喺手機裡面, 影咗佢相都唔知啦!
可憐狗狗呆呆咁坐, 見有狗狗經過就企起身, 好似好想一齊玩!
跟住就見呢個姐姐帶狗狗入番屋苑喇, 主人會以為狗狗去完街街, 運動完喇; 可憐嘅狗狗, 希望唔係每一次都係咁啦.
依賴工人姐姐自己一個去放狗, 真係唔得㗎,  點都會偷吓懶啦!

波波大聲吠,又有狗狗行埋去, 佢頭都唔抬高, 聞風不動, 好嘢!

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！