 |
| 平常相處無問題, 無trigger就ok |
今日講吓屋企狗狗會打交嘅問題, 原來好多朋友都有類似事件, 之前無發生過打鬥, 一向相安無事, 亦唔代表呢件事永遠唔會發生!
以前養過咁多隻狗狗, 從來無發生過打鬥, 即使波波以前都無發生過同狗狗打交呢種事; 但唔知點解最近幾個月佢好不滿豆b!
由其係開餐時間, 佢變得護食起嚟, 好緊張; 以前排排企飲湯湯, 唔通成為絕唱? 究竟呢幾個月中發生過乜嘢事?
有時真係唔知佢哋有過咩嘢交流, 有咩咁唔順眼, 平白無端就扭埋一齊 :(
係因為出街放繩狗引發佢壓力爆煲, 還是係屋企嘅壓力令佢唔可以平靜見其他狗狗? 邊個係因? 邊個係果? 還是有其他原因我真係諗爆頭?
記得豆b初嚟我屋企, 波波都好和氣, 我仲諗可能佢知嗰個係佢家姐, 因為聞到氣味; 兩姐弟追追逐逐, 相互嬉戲, 我覺得咁耐無見都認得出對方好了不起; 當時只覺得達達有唔開心, 佢認定豆b嚟同佢爭波b!
咁就過咗幾年, 達達已經可以同豆b融洽相處, 雖然唔係親暱, 但都無惡意; 我唔可以要求每隻狗狗都咁啱key, 波波同達達嗰種親愛係好難遇, 亦係我養過咁多狗狗裏面嘅最perfect match!
但咁多年落嚟, 反而波波同豆b關係每況愈下....
 |
| 豆b有做安定訊號, 我只可以咁樣影相, 刻意要佢哋坐埋一齊我近來就唔敢試 |
一直以來豆b都較直接主動, 佢乜都要爭第一, 坐車要坐頭位, 拎零食都要跑得快過人, 總之佢要嘅就去爭, 其他嘅從來唔諗; (雖然我一直都有關顧波波嘅感受, 佢一定係No.1), 但難保波波都有不滿, 有壓力, 有唔開心; 近期到咗忍無可忍, 就出現攻擊行為!
豆b自從被波波凶過, 都學識停一停, 等一等, 唔敢亂嚟; 有時見到佢向前衝, 但望到波波會突然停低, 個心好不忍, 呢隻唔係豬豆嚟…
本來我一直都係唔想佢亂衝亂撞咩都爭一餐架啦, 今次係佢兩姐弟自己解決問題, 咁有咩唔好? 一個唔好嘅行為移去, 我反而心痛, 係因為佢過於爭取嘅行為被狠狠地'正處罰'咗, 先學會糾正過嚟, 唉! 可憐嘅豆b ~
近來我格外留心, 一見佢哋有細微不滿嘅警示, 就9秒9分開佢哋, 但都要諗辦法解決問題; 最近除咗睇書, 當然免不了上網去睇睇!
綜合落嚟最有效嘅解決方法, 就係環境管理將導火線移除, 因為越打會越衰!
近星期我做得算成功, 都係用斬腳指避沙蟲嘅方法, 佢哋無再打交喇; 而意外咁發覺用咗呢個方法, 有另類得著!
從豆b第一日嚟我度, 就開始教佢定點尿尿, 佢一向時好時壞, 但近星期佢都識去片片尿尿, 完全無落差, 突然開竅? (不過我唔明兩者有乜關係, 但A話之前豆b通處尿尿都可能係宣洩壓力嘅一種)!
當然問題仍未完滿解決, 波波嗰種不滿相信要一段日子先可以消除; 但安慰嘅係近日佢同朋友仔一齊相處表現有進步, 情緒有放鬆, 希望呢個外來因素, 都會幫到佢學識點樣同其他狗狗相處, 慢慢會更好啦!
下面條link都係討論狗狗打交, 都學到嘢架 :)
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
http://www.clickertraining.hk/forum/viewthread.php?tid=2894&extra=page%3D2
****************
"實情係每隻犬性格都唔同，話一直相安無事係呃人既。
點解會打交呢？
人與人之間相處係學問，狗與狗之間都係。
如果控制唔到，我會建議唔好再製造一堆問題出黎引佢地打交。
"(所以依家分派小食都好小心, 或者減少去比)
"你講的情況我屋企兩隻狗都會有。但無咁嚴重。
多少佢地對其他狗都有護食情況。我的做法係一發現小小SIGN就要唔可以比呢個情況惡化落去為第一原則。 而唔令事情惡化的第一要素，我覺得係無論用任何方法，唔好比呢種事再發生。
(呢樣做緊, 都幾好成績 !)
我兩隻狗都有護食。佢地由細都有做減敏，但我可能做得唔夠好。只要食物係我手，我分發就唔會有咁的情況，但如果高等級的食物，如一隻雞，牛骨之類，佢地就會打交（佢地因為感情好好，所以比較似
兄弟姐妹的打交，唔係要你死我亡，所以好易分開THANK GOD）。 我的做法係分開進食。欄開。唔好比佢地有機會爭。其實就算隔欄，佢地有時都會互凶同互吠。(我都係用圍欄隔開佢地喺開餐時間)
我的做法係暫時係訓練左其中一隻狗食完飯過嚟搵我攞奬品，而IGNORE另一隻狗。咁就唔會再有互凶的情況出現。
總的嚟講，我就係斬腳指避沙蟲。但時間長左，你會發現，避免問題發生間接改善問題
(呢個我都覺得係!)，等佢地對對方無咁防范的時候，再加番減敏。會好好多。 係佢地對對方精神緊張的時候，其實你好難做到啲咩。由其我呢種，又唔係專業人仕，最好用啲EASY啲的方法令自已唔好手忙腳亂，會舒服啲。"
