 |
| 相片連結 |
琴晚一早食完晚飯, 同3隻豬出發落街行, 試過呢個時間係最好嘅, 無人無狗！
點知落咗電梯, 都未行出屋苑大門口, 就知衰咗喇!
先後3次遇上其他狗主帶狗狗出去散步, 係我選錯時間?
原來琴日係星期6, 可能同週日會有唔同, 假期後再試吓, 都係咁就再諗啦; 如果波波唔係咁麻煩, 成日撲撲吠吠, 咁就易辦啦!
咁情況都係唔出外面喇, 都係落平台行吓算啦, 平台又比平時多人, 好多老人家散步, 又有夥埋一group跳健康舞, 我從來都唔知呢個時間平台咁熱鬧 :)
咁情況下當然唔好打擾人家啦, 3隻豬只可以坐住車仔行吓, 好彩呢個時間只係多老人家無小朋友, 波波唔會吠啦!
同佢哋一路行一路吹風, 都幾舒服, 其間遇到一家3口, 一對夫婦同一個小女孩, 佢哋見到3隻豬就行埋嚟傾吓, 當然都係想摸吓達達 :)
個衰豬波又吠到嘈晒, 我唯有抱起佢啦; 呢一家3口都有養狗狗, 佢哋都知道點同狗狗打招呼, 都只伸手放低喺達達胸口下; 佢哋一個一個咁試, 對夫婦伸手達達都退後, 但個細路女伸手, 達達ok呀; 跟住個小朋友摸佢, 佢都無發嬲!
媽媽再試伸手達達都係退後, 小朋友再試摸佢就OK, 個小朋友就同媽媽講, "狗狗驚你哋呀,你哋退後啦, 唔係我無得摸喇！"
好可愛嘅小朋友, 佢摸達達好溫柔, 而我亦見到達達嘅改變, 佢唔想就退後, 唔會好似以前咁動不動就掀牙發嬲喇!
達達自從由甩毛中康復, 一路都有進步, 我係好開心; 不過另方面又開始擔心, 波波情緒行為咁差, 會唔會有其他毛病㗎? 快D到下星期啦, 快快驗血得知結果, 希望唔關事啦!
行咗一輪平台上嘅人慢慢散晒, 可能到咗正常晚飯時間喇, 咁偷雞比佢哋跑10分鐘啦, 我都係要做電兔引跑, 跑呢10分鐘熱到我成身濕晒！
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
