 |
| 相片連結 |
原來琴日作打風, 唔怪得咁熱啦!
琴日又係約會朋友仔時間, 但天氣好熱, 一路步行途中都無風, 太陽又曬; 我雖然做足準備, 鋪咗涼墊落車仔, 再加埋冰枕同風扇, 但都係好熱; 我就開住把傘遮住架車仔, 工人姐姐就同我share另一把遮, 一路行熱到我哋好似快被溶解晒!
 |
| 真係好好風好涼快 |
本來都好擔心咁熱點比佢哋跑, 個地曬到熱辣辣, 但一到目的地就完全兩樣, 非常好風又涼快; 今日掛上咗3號風球, 仲話聽日會嚟得更接近, 打風前夕通常都會較為悶熱, 唔怪得啦!
 |
| 後來波波都無再吠喇 |
今日波波心情麻麻,坐住車仔途中都吠到力竭聲沙, 我真係買佢怕喇! 咁情況下唔做上繩練習啦, 諗都知唔慌有改進喇!
今日又加入咗個新朋友, 係一隻超乖嘅poodle仔, 佢暫時去V度作客:)
波波一見新朋友就吠, 仲要作勢撲過去, 無上繩佢好少會咁㗎; 好彩隻 poodle M仔無同佢計較, 行開避免眼神接觸真係乖, 又幸好波波都係得把聲, 唔敢真係打交真係咬, 身體無接觸啦!
 |
| 呢隻乖乖狗抱起上嚟肌肉實的的㗎 |
佢嘈咗一陣見無受威挾就收晒聲, 跟住落去都無再吠喇!唔知點解佢今日情緒咁差, 又係到接近約會尾聲先開始relax D咋!
V話M仔可能知道波波係緊張所以唔同佢計較, 換上其他狗狗尤其係大狗, 佢一定無咁順攤, 佢都係一隻巴閉仔嚟㗎; 但琴日我見到佢真係好乖, 唔係V咁講我唔信㗎!
 |
| 達達信心強咗不停兩頭行 |
達達就表現正常兩頭行, 可能地方熟識咗, 佢自己行到好遠, 我叫工人姐姐跟住佢, 但唔好騷擾, 不過隻豬女好叻, 佢行到差不多又會回頭轉 :)
達達進步係好明顯, 希望佢可以永遠保有呢一面!
 |
| 豆b想瞓覺 |
豆b就表現較差, 可能係天氣嘅改變, 佢行咗一陣就喘; 我怕咗佢喇放番佢上車, 等佢休息吓先算; 但佢好似被隔離係咁望住我哋, 等佢休息完再放番佢落地, 佢都唔想行, 爬低喺地比風吹住好享受好relax, 差不多瞓著添:)
 |
| 波波快D過嚟霸番媽媽:） |
祈望下次約會波波會表現較好, 呢個仔好黐纏, 任何人或狗狗行埋我身邊佢都緊張, 佢要將媽媽獨佔:(
希望3隻寶貝豬仔有D社交,情緒行為會改變！
 |
| 3隻寶貝豬 |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
