日日都落雨, 天氣好差, 心情都跟住差晒; 每次準備好去街, 就見到又落雨喇, 咩mood都無晒！
3隻豬兩頭行, 除咗食就瞓覺, 我諗佢哋都好想去街街 :(
每日工人姐姐開動吸塵機, 達達都吠到嘈晒, 今日我特發其想, 既然達達咁鍾意出街, 就放佢上窗台望吓, 睇睇街外嘅景色會唔會吸引大, 等佢唔好大聲嗌; 果然, 佢頭仔兩頭擺, 靜晒 :)
放豆b上去佢無興趣, 放波波上去都會陪達達, 但無咩耐性咁樣睇街, 反而達達豬睇咗好耐, 下次吸塵我搵到要佢收聲嘅對策喇 :)
我就另有嘢要做, 早喺年多前有網友要求我做隻羊毛氈狗狗, 我學藝未精, 點敢點頭! 今次令我從新拎起枝針, 決定為佢做一隻羊毛氈狗狗, 因為佢近來遇到嘅事, 我有好深感受; 好多事唔係人力可以掌握, 好多事任你再努力都係無得要求, 幾唔想面對都要接受; 當人覺得無助軟弱嘅時候, 我希望我呢隻微不足道嘅狗狗, 可以叫佢加油！今日終於做好送比佢嘅羊毛氈狗狗, 希望會帶比佢一股暖流, 願佢嘅至親, 佢嘅狗狗都會康復, 願佢有勇氣繼續陪住佢嘅所愛戰鬥!
我從無正式學過呢門手功藝, 只係亂打亂撞亂咁嚟, 當然會有成功, 但有更多失敗例子; 每次做都有唔同感覺, 有時會一鼓作氣, 個感覺帶住隻手, 咁會好快做到個輪廓出嚟, 但有好多時, 無論點做, 都唔會得心應手!唔止一個朋友建議, 叫我當作一個業餘小事業, 既可娛樂又可以賺錢, 何樂而不為? 但娛樂同工作, 點可以混為一談, 一同賺錢掛勾, 咩感覺都會走!
況且我呢D九流手功, 點同正統嘅比較, 主要係我唔想為自己加添壓力; 唔好話要收錢去做比人, 就算係送比人, 呢個挑戰我都唔會接受; 須知一旦答應, 壓力就隨之而嚟, 人家會等, 會期望, 如果做唔成功, 我點放手....所以, 做呢個手功, 都係隨心之所求啦！
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
