 |
| 見唔到狗狗又無其他人, 波波表情輕鬆, 開心㗎! 相片連結 |
琴晚傍晚推車仔出去, 比佢哋坐住車仔睇街街, 唔落地行都要望望外面嘅世界!
波波皮膚嘅紅點無惡化, 但仍然有紅印集中喺肚仔, 我唔敢比佢落地, 始終肚仔離地面咁近都較dirty, 皮膚無事就返屋企清潔吓OK, 依家咁情況就唔想刺激佢喇, 一陣有感染就死啦!
 |
| 一見狗狗就吠 :( |
琴日出去唔太熱, 遇到一、兩隻狗狗啦, 避無可避擦身而過波波一樣猛吠, 跟住表情就開始緊張喇; 唯有轉返入平台行, 但傍晚平台又多小朋友, 仲要踏住單車喺身邊來來去去, 呢個比波波更大刺激, 佢大大聲吠喇 :(
 |
| 之後就時刻戒備好緊張 |
雖然話屋苑無禁止養狗, 但咁吠法都做成滋擾嘛, 而且咁一定帶比波波負能量, 我急急推住車仔遠離人群, 縮埋一角唔敢再兩頭行喇, 還好天氣唔壞, 有風都幾涼快!
仔呀仔你係咪想做宅男唔出街? 如果每次出門你都咁激情緒點會唔壞? 想起以前我可以推住車仔同你哋行維園, 又可以坐住車仔全無壓力咁去街街, 你從來都唔會吠㗎!
點解依家同你去多咗街, 放你落地跑, 情況仲越變越壞? 你會吠, 會撲, 仲會打交!
講真我明白呢D係壓力嘅反映, 咁我已經同你去多咗街等你減壓, 但點解好似有加無減, 越嚟越壞?
唔通你壓力係原本來自去街? 仲要壓力大到皮膚都變壞?
 |
| 行埋一邊無人無狗波波先會開心 |
越想越似越有可能, 唔怪得每次出完街你皮膚更壞!
Dr.Hsiang都話有可能你唔鍾意其他狗狗, 見到佢哋會緊張, 細個時社會化不足, 少見同類影響好大, 周而復始壓力大, 情緒就更壞喇!
我係咪應該再調較, 等你做宅男? 係咪曾經出去令你有過唔好嘅經歷? 係咪有過放繩狗同小朋友衝向你, 你仍未放開仲耿耿於懷? 乜你真係咁耐都未放開呀???
要唔要留喺屋企一段時間, 等你洗滌心靈再從新出發?
真係最怕好心做壞事, 以為係為佢好, 行多D街街, 點知谷到壓力爆晒! 如果佢識講都好辦, 依家唯有樣樣試吓, 睇睇邊樣撞得啱啦!
達達明顯出街多咗就較開心, 我唔可以將佢都困埋, 依家開始分開行動, 波波留守屋企調整情緒, 達達就跟我落多D街!
豆b嘛, 一直都懶唔想行, 氣管又壞, 間疏D出去喇!
我哋每個人所追求嘅都有偏差, 無論精神同物質需求都唔會一樣, 每隻狗狗嘅需要都有唔同啦, 下次同朋友仔約會唔帶波波喇!
都係甲之蜜糖, 乙之砒霜啦(唔想用熊掌嚟形容啊, 用得我好唔舒服), 睇吓情況再作調較啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
