賭一舖！

今日同波波沖涼,  因為佢肚仔皮膚都未見好轉, 一直都係膠著狀態, 無好都無壞; 上次Dr.H有講, 如果變差要食消炎藥, 依家都可以比佢食少少敏感藥, 等佢唔好抓, 唔好抓到皮膚變差!

我一直都有同佢噴住神奇水, 可能係咁嘅關係, 我從來無見過佢抓; 敏感藥都係治標唔係治本, 既然佢無抓亦無變得更差, 我唔想比佢食藥喇, 但時間過咗咁耐, 咁落去都唔係辦法, 佢之前有紅點嘅地方變咗有黑色素沉澱, 肚仔花斑斑喇!


理論上紅點無咗而皮膚變黑斑都算係有好轉, 問題係佢都有新嘅紅點出現, 咁點算?
突然諗起達達嘅DERMagic shampoo, 官網睇過皮膚有問題嘅狗狗用咗都有好轉, 主要成份都係天然, 我就同波波賭一舖啦! 
點解話賭博? 其實皮膚喺咁敏感嘅狀態下, 用新產品會唔會更刺激起? 令情況更差?
 

反正幫達達入咗新貨,就同波波分享啦!

我下呢個決定都猶豫咗好耐, 究竟用定唔用, 用錯咗最差嘅情況會係點㗎?
最後都決定博一博, 先用一滴洗洗小範圍肚仔, 等吓有無唔妥再作決定啦, 好幸運等咗幾個鐘波波肚仔皮膚無異常反應, 咁去馬喇!

沖完涼再浸蘋果醋, 好似見到新希望; 呢段日子以來, 波波總係日間皮膚較好, 夜間又比較差, 會見到紅紅哋喇! 但今晚同佢檢查, 好正常無紅呀 :)

再觀察吓, 如果真係worked下星期再洗吓, 只要唔再紅就希望黑色素慢慢退下, 咁就好啦!!!

寶貝仔你快D好番啦！

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！