 |
| 相片連結 |
今晚再嘗試早D食晚飯同3隻豬行街街, 又OK喎, 咁可能週末假日大家walk dog都同平日唔同時間, 唯有放假唔出街啦, 就留喺平台遊車河算喇!
今晚當然都係波波第一個行, 今晚好好風, 波波又好好mood喎, 佢跑呀跑, 跑得好輕鬆; 因為正係人家晚飯時間, 街上好靜, 咁就正適合波波啦, 呢隻仔好敏感㗎，一吠開頭就好麻煩!
跟住就輪到達達, 都係一樣, 密密咁行, 其間遇到一隻放繩松松, 佢跑過嚟聞達達, 因為狗狗唔係大狗, 亦無惡意, 我由得佢聞吓啦; 佢一路跟住達達個pat pat係咁聞, 達達無理佢呀, 繼續前行!點知呢隻狗狗行行吓去咗達達面前, 達達發惡喇, 掀嘴同吠佢啦; 狗狗走開後我哋繼續行, 轉咗彎又遇番狗狗喇, 佢今次竟然擒達達, 咁梗係唔得啦, 我推開佢抱起達達, 狗狗仲跟住我行!
跟住到豆b喇, 佢唔係好願行, 行一陣就脷都伸長晒, 真係怕咗佢啦! 行行吓又遇番嗰隻狗狗, 佢又跑過嚟聞豆b喇, 今次個主人一手扯開佢係咁打, 唉! 唔好咁啦!!
 |
| 松松又聞豆b， 今次比主人打！ |
同豆b再繼續行, 望到前面有一位女仕拖住3隻松松行, 我好羨慕呀, 點解人哋教得咁乖, 我就縱壞晒!
波波見到狗狗又開始吠, 要番屋企喇, 又到放狗高峰時間; 我正想轉身, 嗰位女仕同我say hi !!
 |
| 使唔使條脷伸到咁長呀？ |
佢話好開心見番我呀(我無印像見過面啦), 佢話認得豆b, 因為豆b細細隻當日有同我傾談, 仲知我有另外兩隻狗狗啊; 跟住見到車仔上嘅波波同達達, 即刻被達達電暈喇, 狂影相 :)
 |
| 一拖三, 好羨慕啊！ |
真係唔好意思, 認路我唔得啫, 但認人自問唔差㗎, 係邊位呀??
原來係幾年前屋苑趕狗事件, 限令14日要驅趕狗狗, 當時屋苑發起集會, 我有去支持; 當日我帶埋豆b去, 就係嗰個我生平唯一一次支持嘅集會, 我哋見過面 :)
嗰日太多人喇, 我無印象啦！
 |
| 每次出去達達都比人影相嘅 |
傾談咗一陣, 原來好多人帶狗狗搬走咗喇, 佢都無出街一年多, 依家風聲無咁緊再博吓!
當日立令要全部狗狗遷出都幾慘㗎, 聽聞喺入住時有問過地產商同管理處, 係接受住戶養狗書面申請嘅, 有狗主做咗屋苑規定領有由屋苑發出嘅牌照, 點知新主席一上場就一刀切, 一律要趕 :(
如果公契係話養狗之前要得到管業處同意, 然後經過申請領牌, 咁就OK, 點可能出爾反爾, 人家做晒所有程序, 領有牌照, 都要人家將狗狗放棄?
公屋領牌戶尚可養狗狗至終老, 呢個私人屋苑咁不近人情, 真係令人震怒, 雖然唔係我住嘅地方出事, 但都去支持, 踏出我生平捍衛狗狗嘅第一步 :)
依家事件沉寂落嚟, 希望佢可以無風無浪同狗狗好好住落去啦！
 |
| 藝員商天娥到場支持 2010年嘅豆b |
 |
| 有寵物傳心師參與 仲有毛孟靜到場撐狗主 |
