 |
| 白雲移動速度好快 |
呢幾日心情唔多靚, 日日落雨更大影響, 今日難得無雨, 望向窗外好多白雲, 我眼定定咁望, 佢哋移動得好快, 轉眼間.....完全無晒!
 |
| 一轉眼間無晒 |
人嘅一生都變動好大, 有時真係全無自主權, 今日有嘅都未必捉得緊, 除咗珍惜所有, 更要懂得活在當下啦!
幾日都無同3隻豬行街街, 難得今日萬里無雲, 要好好把握喇, 自己都需要出去行吓, 心情唔好更應該做個調較, 好多嘢都唔係人力可以控制, 做咗要做嘅, 唔放棄, 咁就係最好啦!
一連幾日都落雨, 氣溫都降低咗, 我可以選擇中午出去啦, 試過咁多不同時段, 都係中午最少人, 為咗波波可以跑吓, 我都係揀番呢個時間!
 |
| 相片連結 |
先坐車落平台熱身, 坐住車仔兜吓彎, 等波波先習慣!
平台上有幾個小朋友, 見到我哋又走過嚟, 波波又吠啦; 其中一個小朋友見到波波吠, 就同佢嘅朋友仔講, 叫佢哋唔好直望住波波啦, 咁狗狗會不安㗎; 果然幾個小朋友唔再望向佢, 波波收咗聲, 我問呢個小朋友係咪有養狗狗呀!
佢話佢好想養一隻雪撬犬, 爸爸話養狗狗唔簡單, 要先熟習狗狗嘅特性, 有充足準備先可以養㗎; 佢話佢爸爸細時有養過狗狗, 後來狗狗年老離開就再無養喇!
呢個小朋友大概7,8歲, 手上拎住一隻毛公仔雪撬犬,睇嚟佢真係好鍾意雪撬犬啦; 佢話每晚爸爸都會講吓有關狗狗嘅知識比佢聽, 所以佢知道波波不安就唔望佢啦!
喺我哋傾談其間, 波波真係無再吠, 因為呢幾個小朋友都好乖好合作, 無再直望波波喇!
好感動有咁好嘅家庭, 有咁好嘅教育, 會教育下一代愛護動物, 要養狗狗做足功課, 要小朋友熟識狗狗習性, 相處就較簡單; 呢個家庭會關注一D咁相關嘅課題, 一定唔會係隨便遺棄動物嗰種人啦, 希望小朋友同佢未來嘅狗狗幸福愉快!
同幾個小朋友傾咗一陣, 又風雲驟變, 有一兩點雨喇, 咁又唔出得街; 番屋企前放佢哋落地跑一跑, 佢哋都好開心, 尤其係達達 :)
今次跑咗唔夠10分鐘時間, 又落雨喇, 要趕快歸家!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
