 |
| 相片連結 |
呢幾日都係keep住比佢哋坐住車仔遊花園, 無落地行, 豆b係完全無問題, 佢只係鍾意出街睇景, 要佢行就好懶; 反而最慘係達達, 佢好鍾意出去跑, 係屋企佢又唔敢行地磚, 咁佢行得嘅地方就好有限喇, 一連幾次同朋友仔嘅約會都因唔同原因取消咗, 希望下星期天公做美天氣好, 等達達豬舒展吓筋骨啦!
之前影低咗一段矇查查黑嗎嗎短短嘅vedio, 但都睇到達達出去行行, 係充滿自信, 一D都無怯㗎!
波波都唔比佢行, 呢兩日觀察住佢肚仔嘅皮膚真係有好轉喇, 咁都係保持清潔唔好咁近地面啦, 睇嚟DERMagic呢隻shampoo真係唔錯, 不枉咁遠訂番嚟, 再一次睇清楚佢成份天然, 無毒性㗎, 有皮膚問題嘅狗狗真係可以試吓, 真係值得再一次介紹, 唔使吓吓都用有藥性嘅shampoo啦!
DERMagic Peppermint & Tea Tree Oil Shampoo
Free from harsh chemicals, this shampoo prepares inflamed skin for treatment with DERMagic Hot Spot Lotion or Salve and is perfect for bathing dogs any time. Combining calming distillates of peppermint, melaleuca (tea tree oil), lavender, chamomile, and rosehip seed oils with the conditioning properties of aloe vera, vegetable glycerin, oat extract, and wheat proteins, DERMagic’s shampoo is specially formulated to soothe and condition the skin, eliminate odor and stimulate the healing process. A foaming, sulfate-free shampoo with a delightfully fresh scent, this is the first step in restoring healthy skin and shiny fur in animals. Use together with our all-natural Peppermint and Tea Tree Oil Conditioner for best results.
過兩日就寵物展, 今次會去行吓, 一早叫老公攞假, 我唔放心交低3隻豬比工人啦, 呢個姐姐好大頭蝦, 我怕怕! 唔想有咩意外我殺咗佢都補救唔到啦; 有時朋友話我太緊張, 人家無工人咁點辦? 老實講無工人我放佢哋入圍欄, 放番兜水, 咁就OK喇; 最多我肉赤佢哋無人陪住好慘, 唔會擔心佢哋安全問題嘛!
呢個姐姐心哋唔壞, 但就好自主, 我怕咗佢喇; 留低3隻豬我驚佢唔識抱又去抱, 又隨便比零食啦, 試過夠膽死叫波波入廚房比切緊嘅紅蘿蔔佢食, 激死我呀!!!
佢話佢知波波可以食紅蘿蔔, 但問題係我從來唔比狗狗入廚房, 亦比過守則叫佢唔可以隨便餵佢哋食嘢嘛, 如果哽死咗我點算呀?? 呢個係我承受唔起嘅意外, 呢個姐姐令我好唔放心呀!
但題外話都要讚吓, 呢個姐姐算肯做肯學, 人無完美, 心哋好唔黑面算係咁啦, 但自把自為呢點就較難修正, 同佢講佢永遠答I thought........
唉， 唯有自己跟緊D啦, 好嘅工人真係唔容易遇到喇！
今次去寵物展主要係睇睇眼仔嘅補充品, 幾隻豬都快7歲喇, 係時候未雨籌謀, 幫佢哋補吓眼仔喇; 我過咗身嘅5隻狗狗, 有3隻年老時都有不同深淺程度嘅白內障, 而其餘兩隻無呢個情況, 只係佢哋10歲就離開咗, 無經過呢個階段啦; 以前養5寶, 唔識咁多亦無咁多時間, 單一餵狗糧, 同依家相比係有偏差, 我希望呢3隻豬仔在我能力範圍下得到最好嘅照顧, 可以幫到嘅就盡量去幫啦!
呢兩日先上網做吓資料搜集, 要睇睇咩嘢補充品先啱, 仲有就係呢3隻豬體重太輕, 補得過量就愛佢變咗害佢喇!
睇咗好多眼仔補充品,包括人食同for狗狗嘅, 大多都用上葉黃素(Lutein), 葉黃素係唯一可存在水晶體嘅類胡蘿蔔素, 可以增進水晶體嘅抗氧化能力, 抵抗紫外線同自由基嘅傷害, 並可保護眼睛嘅微絲血管, 維持良好嘅血液循環, 係抗白內障嘅超氧化劑, 不過大家要留意, 葉黃素屬於脂溶性維他命, 攝取過多會積存體內, 造成反效果㗎!
爬文見到有寵物眼科醫生建議每kg嘅狗狗每日可以攝取0.8~1mg嘅葉黃素, 大家可以做個參考, 要提醒大家一句, 用任何補充品都要注意劑量, 唔好太信推銷員,要自己做吓功課呀; 我最怕就係好心做壞事, 可以行番正路尚好, 有時係無回頭路走㗎, 始終最關心你嘅寶貝嘅, 一定係你自己啦!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
