 |
| 相片連結 |
天氣一直唔好, 加上其他因素, 3隻豬同朋友仔嘅約會一再押後, 原來上次約會距離今日足有一個多月, 時間真係過得好快 !
終於等到今日無落雨, 天氣都叫做好啦, 一唔落雨就氣溫好高; 今日又同朋友仔聚會, 幸好佢哋約會嘅地點有風有上蓋, 唔係都會擔心中暑問題, 因為達達依家好厚毛毛, 上星期都同佢修短少少喇!
達達喺屋企唔敢行地磚, 難得佢咁enjoyed出去跑, 咁點都要滿足吓佢!
今日同姐姐只帶豆b同達達出發, 決定留低波波喺屋企, 要下呢個決定好難 :(
我個人踏出門口, 但個心就無隨我同行, 我所有朋友都知波波係我嘅心肝寶貝嘛, 無帶波波一齊, 無論今日兩個女玩得幾開心, 我都會視之為一個有缺失嘅約會!
今日唔帶波波, 主要係佢肚仔嘅皮膚剛有改善, 我唔想佢再接觸到致敏源, 其實我都唔知咩嘢令佢敏感, 但再接觸又濕又熱嘅天氣, 佢嘅皮膚一定唔會有好轉; 其次係上次嘅約會發覺佢有D問題, 總係自己一個坐低, 比好多安訂訊號, 完全拒絕融合外界, 我感覺佢有不安, 現階段唔想勉強佢喇; 可能佢真係太遲開始社交生活, 一吓子活動緊扣, 佢未能消化啦, 我要比多D時間, 睇睇情況再決定條路要點行, 唔想有壓力令佢產生負能量, 想緩解佢嘅情緒壓力變咗適得其反!
從寵物展開始老公一連攞咗幾日大假, 今日就由佢負責安撫個仔啦; 琴晚已經同佢商量, 點先可以令波波心靈唔受傷害, 唔可以要佢眼睜睜睇住我只帶兩個女出去嘛, 即使困佢入房佢都一樣會感應到啦, 咁點算好?
最後決定老公先我一步帶波波落去遊花園, 比個時間空隙我哋GO GO GO!!!
希望波波皮膚同心情都快D好, 我真係唔想再行呢一步!!!!!!
到咗約定時間地點, 達達有D緊張, 可能太耐無過嚟玩喇, 幸好中段時間可以放鬆, 佢有尿尿嘛 :)
豆b比之前行多咗, 可能波波無嚟, 佢唔使爭寵啦, 佢無步步都黐住我!
本來今日都ok, 不過遇到一個自私嘅主人, 將一切破壞晒!
突然聽到好嚮嘅狗吠聲, 原來有人帶住一隻金毛同一隻poodle, 隻金毛體積又大聲又大, 而隻poodle係無上繩嘅!
我哋立刻抱番起自己嘅狗狗, 唔想同佢哋有接觸; 呢度無上繩唔係問題, 我哋都無上繩, 但就要有能力控制好自己嘅狗狗嘛!
呢個主人任由隻poodle亂咁撲, 先後幾次撲上朋友V身上, 但個主人完全無意去控制! 狗狗失控可能太興奮, 但唔管束任由佢騷擾他人就全係主人問題, 我好慶幸今日無帶波波嚟, 如果比佢遇上呢隻放繩狗, 多日來培養好嘅情緒一定前功盡廢!
我哋阻止狗狗向住我哋撲過出嚟, 呢個主人仲眼厲厲, 好似我哋唔著咁; 真係十人生九品, 世間上實在太多自私嘅人喇!
遇到咁嘅人我哋唔想再留低, 希望下次唔會再遇到佢!
番到樓下電聯老公叫佢同波波先入房, 我唔想個仔見到架車由我從街外推入嚟!
快手放低兩個女, 急急叫姐姐收咗車仔入細房, 然後開門抱番個仔, 波波豬媽媽好掛住你啊！
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
