 |
| 相片連結 |
今日同3隻豬沖涼, 由早上10點做到下午5點幾, 午飯都無食, 散晒!
每次同佢哋沖涼都要夾時間, 我可以唔食午餐, 但3隻豬仔就唔可以捱餓㗎:)
通常第一隻沖完, 就係佢哋午飯時間, 但只會餵兩隻, 因為食飽沖涼唔係咁啱, 未餵嗰隻先沖涼食遲D, 餓一陣總好過太飽洗白白!
所以每次沖涼次序都唔同, 每隻都平等有機會排第三:)
之後第二隻沖完, 就去食午飯, 呢個時候距離上一輪午餐都有兩個鐘時間, 咁未沖嗰隻接續住就最啱!
3隻豬仔都沖完就飲湯, 晚飯稍為壓後, 每次程序大致一樣, 時間緊逼我自己食晏都無時間; 佢哋一向都係太上皇, 老公成日都話自己唔食都要比佢哋食飽飽 :)
波波有幾日無行街喇, 出去都限於喺平台遊車河, 佢情緒比較平靜, 我比零食時見佢無之前咁緊張喇; 豆b應該都感受到波波嘅改變, 因為早一段日子佢都怕咗波波, 唔敢靠近佢啦！
可能波波比較自閉係裙腳仔, 我又因佢細時肝有事出街都唔比佢落地行, 之前住嘅地方又好少見到狗狗㗎; 自從搬咗屋, 一吓間生活模式咁大改動, 久而久之壓力積聚, 佢亂晒!
近來佢應該壓力好大, 除咗肚仔出晒紅點, 又開始抓番耳仔又卒眼, 成身都敏感晒 :(
上次Dr.H同佢有檢查眼仔耳仔都話佢無事, 驗血又正常, 咁嘅徵狀都有機會係情緒引發; 又一次覺得自己好心做壞事, 又要慢慢同佢再調較!
呢個夏天決定少D出去, 豆b氣管好差, 太熱太凍都氣喘, 達達咁厚毛毛難散熱, 我又唔敢剪佢D毛啦, 有心理障礙嘛!
就等達達多D留喺屋企涼冷氣, 豆b休息多D, 波波調較好情緒啦, 留喺屋企佢哋自己玩都好開心嘛, 又買咗條新隧嘟道比佢哋跑, 都可以運動吓啦:)
 |
| 橙色新隧道, 幾靚吖 ：） |
不過都想帶兩隻女同朋友仔聚會, 主要係達達開心, 而嗰度唔熱仲好涼爽嘛!
波波就留喺屋企陪爸爸, 買D好嘢食補償吓, 呢個係目前最好嘅選擇, 過一段時間睇吓情況係點, 再作打算啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
