 |
| 希望Van Van唔會再有其他後遺症 |
從網友fb上知道又一單狗狗醫療失誤嘅事件, 網友嘅松松比一個初入行嘅女醫生攪到雞毛鴨血喇!
呢個網友都會同我私下傾談, 大家嘅狗狗有咩唔舒服, 都會 PM我一齊商討, 佢嘅狗狗都好出名囉, 尤其養松松嘅都一定有所聽聞, 小狗有一定知名度, 佢就係好多寵物雜誌都見過佢相片嘅Van仔喇!
話說大概一個月前, 狗狗食嘢無胃口, 有嘔同便便唔通暢, 媽媽話懷疑Van仔啃牆, 怕有異物留胃同腸, 就帶佢睇醫生啦; 一般都係食腸胃消炎藥, 醫生話如果再有嘔就要留院照胃鏡, 一個落月嚟都頗反覆, 有時好轉, 有時又唔太好先攞命!
本來睇開Van仔嘅係一個資深嘅好醫生, 但佢接咗一個嚴重嘅case要幫狗狗, 就將Van仔嘅case passed咗比一個新入行嘅女醫生, 咁惡夢就降臨!
Van仔覆診跟呢個女醫生, 食佢開嘅藥都一路有嘔, 咁唯有安排照胃鏡, 唔搵出原因無法對症下藥!
帶狗狗去診所放低照胃, 影片足足照咗20張, 接狗狗番屋企後有一次好似石灰狀嘅便便, 媽媽同狗狗覆診帶同便便, 問醫生係咪異物已痾咗出嚟, 女醫生話嗰 D係顯影劑, 然後無棱兩可話要開肚睇!
媽媽好驚, 擔心之餘搵番之前嘅高級醫生, 高級醫生睇片後竟然話腸胃通暢, 痾出嘅應該係顯影劑帶同少少異物, 先前懷疑有嘅異物已經清除, D片無顯示!
媽媽開始質疑女醫生判斷, 再請資深醫生覆睇佢開嘅藥, 點解一路食一路嘔, 原來劑量過高, 全部要減番輕.....
事情並未告一段落, 狗狗一路落嚟開始嚴重甩毛, 皮膚轉灰黑, 搵高級醫生跟進, 不排除係照片20張太高輻射影嚮, 可能影響咗甲狀腺!
安排驗血後確診甲狀腺真係出咗毛病, 仲話要留心小朋友呢30天內牙肉有冇變白, 要每日記低幾多心跳, 有否不正常; 大小便又如何, 怕其他內臟會因 20 張 X-ray 輻射都有壞影響!
以上情況我全係在Van媽wall上睇佢嘅留言, 我自己就有D唔明, 原本話狗狗係照胃鏡, 狗狗做嘅同我係咪唔同? 咩照20張? 似係做腸胃鋇劑攝影嘅X光檢查, 因為有提及顯影劑, 呢個就會牽連幅射問題! 我人去照胃鏡依家多數直接吞下有鏡頭嘅喉管, 亦唔需要飲顯影劑喇!
我唔清楚狗狗做嘅係咩檢查, 但重點係呢個檢查係咪一定有需要, 有無同事主解釋可能有嘅副作用問題, 有無得到主人同意照咁多張片?
本來有時事主可能過份激動, 呢類事件唔可以睇單一方向, 但今次連高級醫生都承認一隻松松一日照20張片係有大影響, 承諾會跟進事件, 有可能要女醫生道歉!
OMG, 點解可以咁無良, 自己未夠班又唔請教高級醫生, 難道狗狗係可以亂嚟 ? 佢哋唔係命???
Van仔媽媽有可能向獸醫管理局投訴, 要教訓呢個無料醫生咁無良, 如果因為咁令一個小朋友從此變成長期病患, 日後會唔會再有其他壞影響仍係未知之數, 真係再做幾多都唔可以扭轉變差咗嘅健康啦!
我哋身為狗狗嘅媽媽, 狗狗有病已經六神無主, 佢哋有事又唔識講; 身為一個動物醫生係一個橋樑, 我哋只可以講出佢哋嘅徵狀, 全靠獸醫嘅專業幫忙!
無一份愛心, 無能力去判斷症狀, 無專業操守, 無愛護生命嘅胸懷, 點配做醫生?
仲有唔同主人作足夠構通, 就會引起好多不必要嘅誤會爭拗, 對自己對病患都係唔好啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
