 |
| 達達沖完涼修整齊少少毛毛, 快生日會嘛！ |
琴日同達達搽EMU OIL後沖涼, 都係洗到我死死吓, 原來之前覺得容易清洗, 只係因為佢無毛啦; 怪唔得知波波咁難洗, 因為毛長嘛, 今次達達仲洗得耐過波波好多啦!
沖完涼同達達吹毛, 發覺佢有一粒乳頭大咗呀, 週圍皮膚都紅咗, 發生咩事呀? 我每日都同佢梳毛清潔, 之前都無見咁樣, 咁點算?
叫自己冷靜先, 唔係急病嘛, 點都要同佢吹乾毛毛先啦, 一邊吹毛一邊同佢噴上神奇水, 睇睇會唔會有好轉！
唉, 達達豬你唔好嚇媽媽啊！
 |
| 左右兩邊size分別好大 |
然後同佢探熱再慢慢檢查, 小心按壓睇睇仲有無其他問題; 探熱係37.8度, 體溫正常, 喺乳頭週邊按壓唔覺有硬塊, 亦無流出分泌物, 咁都無咁驚, 噴咗神奇水後, 皮膚無之前咁紅喇; 我最驚係腫瘤啦, 不過表面睇就唔似, 之前精精同樂樂有乳腺瘤唔係咁樣嘅, 我有經驗, 所以今次比較鎮定啦; 然後再請教 V, 佢對動物順勢療法有一定認知嘛, 佢話如果我擔心, 可以比達達補充少量vit. C啦！
 |
| 噴神奇水後, size好似接近番少少 |
人一心亂就咩都唔記得喇, vit. C對狗狗都有一定作用, 有需要時係可以添加！！維他命C可以抗感冒（上次波波發燒, Dr.H有叫我比波波補充, 對感冒有幫助架), 協助製做紅血球, 避免細菌感染, 治療傷口, 防止出血, 消滅病毒, 提高免疫能力, 好處真係唔少; 之後每兩個鐘同佢噴一次神奇水, 好似細咗DD, 睇落似係磨損, 希望唔好發炎啦; 我叫自己唔好咁緊張先, 觀察一晚再算!
 |
| 今早又好過琴晚 |
一整夜天氣好差, 又行雷又落大雨, 我喺3隻豬週圍噴上Chill-Out香薰, 達達再無兩頭騰喇, 不過雷聲一嚮佢都會坐起身, 然後好耐先肯瞓番!
今早都有行雷落雨, 但一起身我最關心嘅係達達嘅乳頭, 第一時間同佢檢查, 再小心按壓; 情況比琴晚進一步有好轉, 無咁紅喇, 咁外用繼續噴神奇水, 內服就補充維他命C啦, 再觀察!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
