 |
| 相片連結 |
以為就住就住, 試吓改變環境, 波波情緖會好番, 唔會再同豆b打交; 琴日夲來都好好哋, 到咗佢哋晚飯時間, 我入去廚房準備, 兩隻豬就企喺門口等啦; 以前都相安無事, 點知琴日等等吓, 又打起上嚟喇!
我真係無哂辦法, 都唔知應該點辦, 點解波波依家咁煩!
避咗出街, 食餐分隔, 比零食都避免相爭, 仲可以點辦? 已經進行咗環境管理, 但成效不大, 我覺得好慘!
琴晚食完晚飯帶晒佢哋落街, 一於比波波喪跑, 反正左避右避都唔係辦法, 不如消耗吓佢體力等佢無咁好精力發難; 初段無狗狗, 我拖住佢跑, 見到狗狗我抱起佢算喇, 由得佢吠我無理佢, 抱起佢掉頭行, 避過狗狗再放佢落地跑, 唔再理咁多喇!
呢個死結我無辦法解, 唯有見歩行步啦, 唔比佢去街唔係辦法,唔比佢宣洩D壓力仲死啦, 另一個弊處就係唔跑街指甲好長, 同佢剪又唔合作, 縮嚟縮去怕整傷佢啦, 用磨甲器佢都唔鍾意嘛; 之前喺街行, 佢會磨吓脚仔, 指甲好短㗎, 完全唔使剪啦, 咁都係唔諗照出街啦!
琴晚到達達行嘅時間, 見到一隻放繩POODLE, 企喺度兩頭望, 唔行!
我睇咗好耐, 佢神情好徬徨, 似係走失啦, 咁點辦? 我帶住達達陪住佢, 見佢行又跟住佢行, 我怕佢走出馬路呀; 一路跟住佢跑..... 見到主人喇, 我問係咪狗狗走失? 佢話唔係, 佢話狗狗唔願行, 匿埋嚇吓佢啦!
吓?! 搵D咁嘢玩, 狗狗徬徨嘅樣我見到都心痛啊, 不過狗狗見番主人又唔覺好開心, 都無飛撲埋去, 好冷淡:(
呢排都覺得波波毛毛薄咗, 琴晚同佢影相睇到好明顯喇, 佢皮膚敏感後有黑色素沉著, 我試吓搽油後沖涼呢個療程啦; 不過佢情況唔同達達, 我唔敢用emu oil 怕佢會敏感啊, 今次我用椰子油, 反正椰子油對傷口, 徽菌感染, 蚊叮虫咬都有好處, 能抑制致皮膚病患嘅細菌, 病毒, 霉菌, 紓緩濕疹等, 我就試吓啦!
今早同佢搽油, 5個鐘後沖涼啦, 跟住再用LASERCOMB照吓!
 |
| 波波搽油有D難度, D毛太長喇! 主要搽肚仔同兩腿嘅黑色素, 其他毛毛搽少少啦! |
 |
| 著番件衫啦, 毛毛肥騰騰 |
原來椰子油好難洗得清㗎, 達達用emu oil 我用兩次shampoo就過清晒, 今次我足足用咗4次洗毛液, 洗到我死死吓, 好彩今次波波合作, 無係都要跳起啦, 沖完涼都仲幾靚仔呀:D
 |
| 沖乾淨涼舒服晒:) |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
