記憶儲存

BeBe & LokLok

8月,有兩隻寶貝選擇喺呢個月份離開, 分別係9/8嘅BeBe同25/8嘅樂樂, 今年我無揀正日去講佢哋, 我唔想再傷感回望過去!!

近日對生死嘅睇法有D改變, 雖然BeBe 10歲就離去, 但生命真係不在乎長短, 我覺得佢比15歲先離開嘅樂樂更幸福! 

生有時死有時, 能夠活得好, 唔敢話要活得精彩, 但能夠有平靜嘅生活, 已經好感恩!

人生有四然:" 來是偶然, 去是必然, 盡其當然, 順其自然."
我要學習以平常心處之泰然啦!



今年我想回味一D甜蜜嘅片段!  
想當日養BeBe,  係經過好大掙扎! 
我一向都好驚狗狗,  見到街頭有狗狗我已經由街尾走回頭, 點會諗到有一日我嘅家中竟然會有狗狗! 

我唔想再要多一個小朋友, 又怕獨生兒會變得孤僻, 老公話不如養狗狗!
為咗唔想阿女一個太孤獨, 想佢有個玩伴, 就唯有勉強接受, 見到阿女抱住狗狗嗰種開心, 又見老公嗰種興奮, 放工番嚟仲要服侍狗狗都唔介意, 仲教阿女點鍚狗狗, 就算驚都要忍受啦!

BeBe係阿女童年時嘅好伴侶

第一次將BeBe抱入懷, 係經由阿女一雙小手, 當時佢年紀細細, 要鼓勵嘅竟然掉番轉頭; 我記得佢同我講, "媽媽, 唔怕, 佢唔會咬, 佢好乖" 之後阿女抱起 BeBe放落我手, 我真係僵硬晒, 慢慢....BeBe舔我, 我漸漸放鬆:)想起仲有好sweet嘅感覺, 係由阿女嘅一雙小手,  引領我從此將一隻又一隻嘅小狗狗抱入懷 :) 

到養樂樂阿女已經長大

多年之後, 無諗過會遇見樂樂, 機緣巧合又帶咗佢番嚟!
小樂樂當時好輕(其實係過輕, 不足2磅),  唔講佢本身營養不良導致佢要住院嗰一段, 我想記住佢一日到晚跑嚟跑去追住個波嘅樣!
嗰時嘅樂樂好開朗, 只要你坐喺地上, 佢就會跳到你身上, 係一隻好黏人嘅甜姐兒 :)
樂樂一身毛毛配住佢輕盈嘅身體, 跑起上嚟真係好靚, 毛髮飄揚!

佢哋陪伴咗我哋好長嘅一段時間(人生有幾多個十年?), 帶比我哋一家好多歡笑聲!  
BeBe, 樂樂! 雖然你哋離開咗, 但我會將你哋最靚嘅笑容放入記憶裡面, 將我哋一齊最好嘅片段儲存起嚟 !

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！