 |
| 相片連結 |
今日母親節, 祝大家有個Happy Mother's Day!
我就麻麻哋happy啦, 包住晒D手指唔想出去喇, 阿女話咁下星期先補返慶祝, 今日少少哋食個蛋糕先啦!
其實日日都可以係Mother's Day, 最重要係happy嘛!
工人姐姐放咗假, 要戴住手套自己動手, 整3餐比寶貝豬啦, 真係唔方便夾麻煩; 呢幾日都照樣一早起身, 要用雙眼代手, 望住姐姐整3隻豬嘅餐, 唔親手做都唔敢偷懶, 唔敢依賴姐姐, 怕恨錯難返!
今日上咗FB某群組, 感覺好差, 見到樓主講句說話都比人鬧, 點解咁多人不問青紅皂白, 好似上咗戰場咁, 用筆猛插!
嚇得留言者道歉兼即時刪文, 但其實佢係咪犯咗好大錯呀?
上呢種網站都係大家閒談, 分享吓養狗狗嘅經歷, 有好嘅得以學習, 做錯嘅引以為鑑, 點解要攪到氣氛咁差?
我睇到嘅係樓主post咗一張俊介(松鼠狗)嘅相, 問呢個係乜嘢品種嘅狗狗咋!
有留言話樓主之前係有問過想買呢種狗狗, 不過post已刪!
跟住見好多好多留言, 話佢不是, 唔尊重生命, 要認養代替購買狗狗等等啦......
即使係要買狗狗, 又犯咗咩咁嚴重嘅錯? 每個人都有特定喜愛嘅品種樣貌, 我一直偏愛松松, 從來無諗過會養其他品種, 我唔認為有錯㗎!
感覺有D本末倒置, 我認為要口誅筆伐嘅應該係棄養者, 無棄養又何來咁多狗狗要認養呢?
再者, 想買一隻幼犬, 從bb階段一直養大, 陪伴住小生命從嬰兒階段, 到老, 到死, 呢個過程彌足珍貴, 只要真心愛錫, 永不離棄就得啦, 呢個先係重點, 點解唔可以有權選擇?
從細時養大, 嗰種貼心親蜜真係唔同, 我養過嘅8隻狗狗當中, 只有bebe, 安安同波波係從細撫養, 唔係話其他嘅唔鍚, 但感覺就係有唔同, 嗰種分別亦好難形容!
我當然好欣賞到收容所, 帶走被棄養可憐狗狗嘅人, 懷住大愛比狗狗重生, 有咁崇高嘅愛心係值得敬重, 相反要買一隻幼犬從細愛鍚, 就受到四方八面嘅批判, 太可怕啦!
每個人都有唔同觀點同立場, 我哋可以唔認同, 但點解唔可以尊重吓?
要聲討者應該係當狗狗如玩具, 見到幼犬可愛就買嚟玩, 然後狗狗有病, 或者狗狗長大唔同咗樣, 又或者狗狗老大難照顧就棄養, 呢D先最要命嘛!
至於繁殖狗狗, 當狗狗係機器嘅繁殖場當然唔可以助長, 要母犬生到老生到死, 公犬不斷配唔理係咪有病, 呢D咁不人道, 咁無人性嘅做法, 係唔可以存在, 要立法取締啦!
相反, 一個真正嘅繁殖者, 會用心鑽研狗狗嘅優良血統, 唔會當狗狗係搖錢樹一樣; 我網上係見過有外國嘅繁殖者, 要求將基因有問題嘅狗狗列表, 等各地嘅繁殖者可以追溯參考, 呢種狗狗永不作繁殖用途!
能夠咁認真, 咁用心去培育優良血統嘅幼犬, 將狗狗嘅優點延續, 缺點避免, 所花嘅心力應該認同; 一個優良嘅繁殖人, 會將母犬好好保護, 繁殖嘅種犬會得到良好照顧, 凡此種種, 令呢個品種得以保存, 無繁殖無新血, 日後何來再有呢個品種? 好嘅繁殖者, 一樣值得敬重!
我哋要聲討嘅應該係嗰D當狗狗如生產機器嘅無良繁殖場, 同動不動就棄養狗狗嘅人嘛!
母親節, 祝願所有繁殖場內嘅狗媽媽都得到適當照顧, 希望當繁殖係一門生意嘅人, 都懷住一點良知, 唔好對待狗媽媽太殘忍; 唔敢要求一朝一夕會有咩大逆轉, 只求對狗媽媽有正常看待就夠!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
