唉! 每日都有新挑戰, 今日波波嚟個大逆轉, 個心好煩 :(
今早起身餵早餐, 發覺波波行得好怪, 個身仲有D搖擺; 早兩日我係見佢行得慢, 左腳有D僵硬, 估計佢係腳痛啦, 但今日發覺完全唔同晒!
琴日見佢無叫以為佢好D, 原來錯晒!
今日見佢行得有D困難, 左腳有輕微拖住, 我叫佢時佢唔抬頭, 只係抬起雙眼; 我尾隨佢入洗手間, 見佢唔可以抬脚尿尿, 四隻脚仔都要踏地, 我個心沉晒!
即刻抱咗佢入籠, 小心觀察, 見佢頸仔梗梗個身仲震晒 :'(
個徵狀同步伐, 同豆b上次頸椎出事有90%相似, 咁即係唔關腳仔事, 係頸椎問題反射落腳仔, 又係椎間盤問題啦!
我已經做足保養, 但都係要出事, 又要再闖難關 :'(
去到呢個階段, 只靠順勢療法應付應該唔得喇, 波波要用強D嘅藥去幫啦, 明知西藥副作用大會影響佢肝臟, 但已經別無他法, 唔穩定佢病情萬一變差, 有機會變癱, 到時仲慘!
還好有豆b嘅備用藥, 可以幫波波舒緩症狀於第一時間!
食咗藥再觀察, 我點都唔會考慮手術呢一環, 都係諗住依靠藥物控制, 我唔想去太平道喇, 講真上次側身加埋今次頸椎出事, 相信佢哋會叫我照MRI!
但我相信今次應該用呢組藥係啱, 因為無耐見波波表情有放鬆咗, 頭仔都郁動正常番!
相信食藥困籠休息會幫到波波, 有咗經驗要捱一兩個禮拜!
再觀察, 今次諗住搵Dr. Fan幫我諗辦法!
波波每次都係咁煩, 即使我第一時間用順勢療法, 都未必搵啱對策; 呢個仔個性太強, 正值病發高峯期間, 用溫和嘅藥唔啱, 但佢個肝又受唔到咁強嘅藥, 真係兩難!
兩者取其優我實在無得揀, 佢又唔受到針灸治療, 拖延導致再嚴重D我點辦? 都只可以食咗再算喇!
希望食短時間傷害唔好咁大, 再用順勢藥幫個肝排毒啦!
今日我無再驚到震晒, 已經見慣不怪, 但見隻隻豬都受同樣病症折磨, 感覺極其挫敗!
我日後可以點辦? 身邊有3個計時炸彈, 如果一齊爆發, 我一定粉身碎骨死硬, 未來嘅路已經預見好難行!
老天爺真係好鍾意同我玩, 我發覺每次開心完總係跟住就有驚嚇, 係咁我寧願生活過得平平淡淡!
講真其實達達幾日前咁有進步, 我都隱隱感到唔舒服, 但我唔想庸人自擾, 唔想應咗A話我一向係悲觀主義啦, 我想改變嘛; 又希望借助宇宙吸引法則, 諗向好處將好事吸引嘛!
深呼吸, 叫自己沉著應付, 只可以盡力做好, 其他見歩行步, 望老天爺唔好挑戰我極限, 我唔得㗎!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
http://www.dodgerslist.com/literature/healingpage.htm
