太意外喇 (w/album)

相片連結

今早我坐喺餐檯食早餐, 感覺有隻豬行咗埋我腳邊, 我無為意, 通常都應該係隻為食豆b以為佢都有得食, 又或者係波波過嚟痴痴纏纏啦; 但當我望向腳下, 我竟然見到嘅係達達, 我實在太意外喇!
見到達達嘗試唔依靠地氈自己行, 証明佢開始信心大, 雖然隻豬見我望住佢意外到睩大雙眼, 佢即刻後退番 :)
但今日我見到有幾次佢都有離開地氈行, 我唔望佢喇, 等佢慢慢練習 :)

 一件微不足道嘅小事, 但我就開心咗一大餐, 正如Ka所講, 寶貝嘅小小動作改變, 我就睇到佢嘅進步,對媽媽嚟講, 意義重大!達達自從毛髮開始復甦, 我係見到好多進步, 當然多咗互動, 但最明顯嘅分別, 係餵順勢藥嘅時間; 過往餵藥一定要溶水用針筒, 小小一粒藥丸就將佢難到, 每每見佢個口郁嚟郁去, 最終都係跌番出嚟, 但依家就可以同對twins一樣識舔咗吞落去, 感覺佢各方面都靈活咗, 好開心!

前日同佢哋出去行, 一放達達落地佢就週圍走喇, 當時我已經覺得分別好大, 今日天氣咁差, 有行雷啊, 但達達完全無恐懼, 仲可以大覺瞓啦 :)

明顯甩毛期間一切變差, 我估計喺有特定時間同氣候令佢身體有變化, 一定係某種元素有變異, 直接反映落毛髮!
當然呢個只係我推斷, 事實係點都係猜測, 現今醫學都未有真確解釋到脫毛症, 而呢個所謂脫毛症X又相當複雜; 每個毛孩, 甚至每個時段嘅例子都有分別, 要搵原因實在難, 所以咁多年來, 都搵唔到對付嘅正確方法!

最近呢次達達毛髮變差係好短時間, 我希望以後差嘅日子會越嚟越短啦, 我要懷有正面想法, 記住有"宇宙吸引法則"嘛 😊

對孖胎又要剪毛喇, 呢個樣好潦倒 :)

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！