波波食咗放鬆肌肉同止痛消炎藥, 似乎有好D喇, 個頭仔可以抬起, 面容都比較鬆弛; 但歩伐都仲係似飲醉酒咁搖搖擺擺, 唔可以舉腳尿尿, 每次我都要幫佢一把; 除咗放佢大小二便, 我狠下心腸唔放佢, 困籠係好關鍵嘅做法, 我一定要堅持!
以前同幾個狗友曾經傾談, 有比較過唔同診所用於狗狗有關神經問題嘅藥, 都不外乎呢幾樣, 我應該係比波波食啱, 所以見到明顯幫到佢; 而我比嘅劑量同豆b一様, 咁一定唔會過量, 但始終呢D係豆b嘅藥, 我只想喺未約到醫生時, 唔會因拖延令情況變差, 緊急時用嚟頂住!
佢呢個情況我一定要帶佢見醫生, 因為我唔想依頼西藥, 實在擔心波波個肝有太重負擔, 又怕佢都好似豆b咁生出腫瘤, 真係會嚇死!
雖然豆b停藥後D腫瘤已經散晒, 但我又點知對佢身體為害有幾大? 只可惜我係無得揀, 唔用驚佢哋變癱!
我希望有其他辦法可以雙管齊下, 咁食藥都唔使食咁耐嘛!
其實我仍屬意用針炙幫波波㗎, 無奈佢接受唔到, 勉強無用啦; 之前聽Ka提過有無針針灸法, 都係針對穴位治療, 我好希望試吓; 琴日有同Dr. Fan聯絡過, 可惜今日佢又放假, 所以約咗聽日見佢, 同佢研究吓, 希望會幫到波波啦!
好彩有藥頂住, 唔係真係急死我喇!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
