 |
| 好緊張, 但睇到個頭仔郁到 :) |
今日天氣差到痺, 行雷閃電嚟埋黑雨, 我真係擔心到死; 一來係擔心要同波波出去, 約好Dr. Fan今日睇佢, 一個人又拎遮又拎袋幾難操持; 二來擔心如果我出咗去, 行雷閃電會將達達嚇死!
但老天好有人情味, 我出門口時已經停咗雨, 唔會躭誤我嘅行程, 就連達達都好叻女, 即使行雷都無好似以前咁竄嚟竄去, 面對咁響嘅雷聲都好淡定 :)
我諗一來係佢身體有好轉, 見佢毛髮復甦係一個証明, 二來係近日我加咗花藥比佢!
有一段時間無用花藥穩定佢情緒喇, 一時間用太多補充品太亂, 我選擇先用急需; 近來達達一切都幾好, 開始有勇氣試吓行路, 係指佢嘗試離開地氈, 我諗起用花藥幫佢!
達達一向對另類療法好受落, 但連行雷都唔怕, 今次我有意外驚喜!
波波今日更有進步, 我發覺困籠休息真係一定要堅持; 今朝帶佢入洗手間尿尿, 佢有舉脚, 雖然唔可以堅持到尾, 但有進步已經好好, 康復可以預期; 雖然步伐仍未穩, 但明顯有變好到!
可能今次我無驚惶失措, 情緒直接反影落佢度, 佢都好乖留喺個籠無呱呱嘈!
我覺得自己有少少進步, 可能已經係經驗老到, 明白即使真係椎間盤凸出壓住神經線, 都有分級數, 只要及時醫治唔會係末日到!
多咗常識經驗處理呢種變故係好, 但真係寧願從來唔識, 從來唔遇到!
到咗約定時間到診所, 波波又緊張到震晒, 感覺到佢肌肉僵硬, 呢個仔神經極緊張; 入去見到Dr. Fan, 傾咗好耐, 好小心檢查過波波, 發覺佢前臂, 頸仔同腰椎都好痛, 但唔似係椎間盤凸出壓住神經線, 應該係神經線發炎!
最驚嚇係放波波落地行, 佢緊張到行唔到, 後盤坐下!
Dr. Fan話我用嘅藥係OK, 呢種症狀佢都會開同樣嘅藥, 其他兩隻藥唔傷肝腎, 但一定唔會用Metacam, 尤其係咁細嘅狗狗, 佢本人唔會用; 太細劑量做唔到消炎作用, 用大劑量當然傷肝!
佢話食咗好似龍精虎猛咁仲驚, 只係將徵狀蓋掩問題並未解決, 叫我自己權衡輕重; 其他繼續服用無問題, 最緊要困籠休息, 比佢時間康復!
我睇過好多有關資料, 一早都知呢隻藥唔好, 但當時驚佢變更嚴重; 當日比豆b服用都再三問過醫生, 話咁輕劑量唔驚, 所以照上, 希望食短時間唔傷; 所以話任你幾清醒, 事到臨頭驚佢痛就會驚到亂晒龍!
跟住同Dr. Fan研究IWand無針針灸法, 佢話有例子係用得好好, 但佢唔會視為有神級用途, 但唔否定有一定作用!
佢話呢D咩質子原理佢唔太懂, 呢樣唔係新出品, 十幾年前澳洲已經有用!
佢比我一個狗狗穴位圖, 教咗我點用!
多謝Ka幫忙, 話今晚借比波波試用, 先試兩日睇吓有無效用, 再決定是否去買!
真係多謝咁多好朋友, 永遠唔吝嗇比我幫助, 仲有V同A好關心波波, 第一時間PM我!
養狗狗交到咁多好朋友, 係一個好大嘅得著, 衷心感激!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
