琴日工人姐姐放假, 我哋出去食晚飯, 留低3隻豬一餐晚飯嘅時間, 唔使擔心啦; 過去嗰3個月工人姐姐未到, 一直都係咁喇!
將波波達達困圍欄, 豆b就由得佢自由行, 隔開對孖胎唔怕會打交; 但睇到一個杯都可以做成奪命意外, 諗起工人姐姐一陣番嚟, 怕咗佢唔小心砰砰硼硼, 今次唔敢咁做啊!
最後決定將3隻豬仔困入房間, 開住冷氣熄埋燈, 希望佢哋會乖乖瞓覺; 門前掛住"DON'T DISTURB"牌, 咁姐姐放假返到屋企都唔會攪佢哋啦!
然後自己就靠個webcam監察!
 |
| 見到兩隻衰豬仔唔瞓覺 |
相處耐咗就覺得呢個姐姐同初到時有D唔對辦, 以為佢年紀比之前嘅姐姐大, 會成熟穩重, 做嘢小心D啦, 但原來都係天下鳥鴉!
今日姐姐又打爛咗我嘅芭蕾舞收藏喇, 第一日就叫咗唔使佢清潔唔好掂我呢D嘢啦!
今早聽見佢喺我身後大大聲叫"BROKE", 我轉身一望個心都broke埋!
上個姐姐打爛兩個, 呢個姐姐又嚟刺激我喇 :'(
 |
| 見到都想喊, 好心痛呀! |
呢個收藏品係多年前, 外國一個工匠來港示範拉玻璃藝術, 因應我選擇嘅顏色為我即席手拉, 今時今日當然無得再買!
真係心痛到無命呀, 今次仲無可能用膠水黐得番, 點解個個工人個姐姐都係咁大意無例外㗎 :'(
今日本來要同3隻豬沖涼, 但波波有D咳, 唔敢比佢濕身喇, 呢個仔近來好多事啊, 今日同兩個女浸好喇!
自從豆b有過脂肪腫塊, 就開始毛質變壞, 毛毛旱巴巴, 經過咗一段長時間, 勤做SPA再加順勢療法, 見毛毛有D改進, 開始變番滑 :)
達達毛毛都越嚟越好喇, 白色毛更白, 背部黃毛都越見金黃, 黑毛好少啦; 已經停咗用順勢療劑去幫佢毛毛生長喇!
感恩今次又平安過渡呢個毛髮休眠期, 仲咁順利長出新毛, 亦無之前甩到咁差; 係浸微泡浴幫助到佢加速血液循環, 新陳代謝加快? 還是要歸功順勢療法?
每次浸浴都要用好多時間, 之後仲要教姐姐準備晚飯, 好忙啊!
呢個姐姐烹飪係最弱一環, 煮過嘅餸都記唔番, 叫佢寫notes又唔聽講, 又無記性真麻煩; 之前仲沾沾自喜以為今次搵到個好幫手, 有如中獎喇!
夲來佢做清潔係唔錯, 如果肯好好去做真係值得稱讚, 可惜未足一個月, 佢已經開始懶!
琴日見抽油煙機又滴油, 即係無抹啦, 好失望啊!
以為改變咗方針請個較年長嘅人, 會成熟穩重, 做嘢較上心, 點知我都係無工人運; 仲要人老精鬼老靈, 食要佢揀先用嘢就問都唔問, 我已經對佢好放任!
人都係有劣根, 唔會識感恩, 你越寛鬆佢迫得你越緊, 我真係唔識用工人!
唉算喇都只係自己呻, 唔好用負面情緖去對人, 咁只會有越嚟越差嘅可能, 就叫自己比多D容忍; 希望呢個姐姐只係一時偷懒一時唔小心, 會感受到我對佢諸般容忍, 日後會多D留心啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
