真係比老公氣壞, 縱到3隻豬仔變晒小魔怪, 叫咗唔好夜晚抱D豬仔上床, 佢就硬要做相反!
達達最識嗲爸爸, 一見老公入房就吖吖叫喇, 本來乖乖同波波喺圍欄床嘛, 一見老公就作反 :(
老公就話還佢心願啦, 比佢上大床瞓一陣間, 等吓我瞓先抱番佢落去啦; 達達上大床, 波波就坐直個身望實, 咁我點做好呀? 又要抱埋佢上去啦!
叫我瞓時抱返落去? 見佢哋瞓得咁熟咁舒服, 點忍心趕佢哋落床呀, 又一齊瞓算啦, 即係我唔可以好好瞓一覺:(
夜晚真係無可能比豆b上床, 波波實同佢打交, 波波一直都嬲佢嚟咗後同佢搶媽媽, 最衰隻豆仲越嚟越無分寸嘛! 以前豆b係唔會得寸進尺, 依家就好放肆啦, 明明細粒過波波根本唔夠打, 但都會撩事鬪非搵麻煩; 波波又唔肯相讓, 一涉及爭寵, 大家就死過咁喇!
波波一直係皇帝仔, 一向萬千寵愛, 帶達達返嚟都係因為達達同佢夾, 想佢有個伴開開心心啦, 後來帶豆b返嚟, 我無考慮佢嘅感受係我唔啱!
不過我都唔可以太偏心, 都要小心豬豆嘅情緒變化, 講到底佢都要媽媽錫錫, 爭寵唔可以話佢錯啦, 唯有喺適當時間抱佢上大床瞓吓; 還好豆b最易話為, 上大床即瞓到成隻爛瞓豬仔, 之後可以抱返佢落床仔, 佢有瞓過就無所謂喇!
 |
| 豆b瞓得真豪邁 :) |
唉, 諗諗佢哋都過咗半世, 仲可以有幾耐可以一齊? 就由得佢哋上床, 縱到壞晒都無所謂喇!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
