 |
| 估唔到個蒸面機仲有另一個效用 |
呢兩日得閒又上網睇下超聲波噴霧器嘅介紹, 因為豆b聞蒸氣後呼吸真係好咗, 又幫到佢無再猛打乞嗤, 睇嚟蒸氣治療真係幾有效嘅!
我最初比佢聞嘅蒸氣, 只係一般家居用嘅放濕機, 睇起嚟就好大霧氣, 但原來果D霧氣粒子比醫療上用嘅為大, 我諗只可以做到令佢喉嚨濕潤D, 舒服D, 但就幫唔到佢鼻敏感同打乞嗤喇; 後來街坊狗友教我用少少曼秀雷敦薄荷膏, 我就改用咗我美容嘅蒸面機, 咁又真係幫到佢喎, 不過呢部機噴出嚟係熱嘅蒸氣, 我好怕燙傷佢, 所以成日要用隻手試住個溫度, 又要抱住佢向住出氣口, 仲會整到週圍好多水氣, 都好麻煩!
我睇咗醫學上用果D超聲波噴霧器, 佢係利用電子震盪原理，運用壓電水晶體震盪器，產生高頻率震波(超音波)將液態分子結構打散，用呢個方式將液體震成極細，再利用風扇將霧狀粒子順住伸縮管送向病人氣管, 甚至達到肺部 , 因為霧狀粒子極細( 0.5~6u ), 所以同一般家居放濕機係有好大分別嘅!如果我用一般放濕機, 果D冷嘅蒸氣係唔會有咩大作用, 粒子大唔可以進入到呼吸道, 反而蒸面機, 因為係熱嘅氣, 一般對上呼吸道問題都會有D幫助; 豆b未有急切需要買醫療霧化器, 佢只係鼻敏感, 屬於上呼吸道問題, 作為保健, 無醫療用嗰種機, 唯有麻煩少少, 用住部蒸面機先啦; 反正效果都係見到嘅, 可以幫到佢無打乞嗤喇!
咁當然有部醫療用嘅噴霧器就最好啦, 噴出冷嘅蒸氣, 都可以到達上呼吸道(鼻、咽和喉部)及下呼吸道(氣管、支氣管和肺臟), 唔怕燙傷又唔會整到週圍濕晒; 但呢種醫療噴霧機有好多品牌同型號, 又分超聲波同壓縮兩種, 風速同霧化效果都有不同選擇; 而出產地唔同, 價格又好大差異, 反正唔係急切問題, 等我再慢慢詳細研究下先!
 |
| 噴出蒸氣大嘅時候豆b會用條脷仔舔! |
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
