 |
| 又做日光浴 ! |
難得今日天氣溫暖, 又有陽光, 梗係要同幾隻豬仔出去行吓, 晒吓太陽啦!
我睇過一D資料, 對於甩毛症, 喺外國係可以做物理治療, 用照燈嚟幫助, 又或者晒太陽都好; 最近天氣又濕又凍, 我等咗太陽伯伯好耐喇!
既然知道仲有其他辦法可以幫達達豬, 當然想盡力而為啦; 但我唔係專業物理治療師, 當然唔敢亂嚟, 照燈就免喇, 萬一灼傷就麻煩; 帶達達豬晒太陽係最正路嘅方法喇, 希望太陽伯伯多多幫忙, 唔好偷懶啦!
可能耐咗無出去, 當我拎架私家車出嚟, 佢哋都好興奮, 喺咁兩頭騰喇!
因為天氣好, 今日街上好多狗狗; 波波喺車上見到狗哋已經好激動, 兩頭跳又大聲吠, 我唔敢比佢落地喇, 唔想意外扯傷佢啦, 都係比達達行先!
咁耐無練習, 我預計到達達一定會緊張喇; 雖然佢係緊張, 但佢無坐低唔行, 相反佢好努力練習, 我不斷係旁邊鼓勵佢, 猛話佢叻女, 睇得出佢好enjoy嘅! 只要天氣好, 我一定帶佢多D出去行街街!
轉咗落下一條路, 見到一隻小型牧羊犬, 佢眼神徬徨, 係路上兩頭走, 我又唔見佢主人, 都唔知應該點做好!
波波見到狗哋又狂吠喎, 唯有叫工人姐姐推架車行前少少, 等佢哋做住日光浴先啦!
我最驚佢走出馬路, 所以試吓行過去佢身邊, 睇下佢反應; 對於陌生狗狗, 我唔敢莽動架, 萬一佢受驚咬我咪死; 隻狗狗好乖, 可能見到有人理佢, 安定咗D, 佢停低望住我; 我諗應該係走失啦, 諗住陪佢企一陣等佢主人, 起碼確保佢唔好走出馬路嘛!
我一路同隻狗狗傾偈, 唔理佢識唔識聽喇, 都係想佢乖乖企定定啫, 等咗10分鐘左右, 見到有個女人喺遠處行嚟, 狗狗好開心咁搖尾; 呢位女士手上拎住條狗帶, 一聲不晌喺我旁邊套住狗狗, 咁就扯住狗狗走咗喇!
我既唔覺佢因狗狗走失擔心, 又唔覺佢有搵番狗狗開心喎, 再者見到有人陪住狗狗, 都木無表情, 全無反應, 乜有D人反應咁奇怪呢?
見狗狗搵番主人, 都放心啦! 見到街上再無其他狗狗, 就放波波行行喇; 隻豬仔跑呀跑, 好似要驅散連日嚟被困喺屋企嘅悶氣! 跟住到豆b, 睇見隻豬豆毛髮旺盛, 神采飛揚咁跑, 我真係好開心, 佢無晒早前一面病容, 好神氣呀!
我會keep住間疏咁比佢聞蒸氣, 希望鼻敏感唔好再困擾佢喇, 等夏天嚟到, 應該一切都會轉好!
行咗一陣街街, 同佢哋轉上平台再玩多10分鐘, 佢哋又夠鐘返屋企食晚餐喇, 希望明日天氣都係咁好, 我地再去過啦!
 |
| 月前鼻敏感困擾一面病容, 睇見都心痛啊! 對比起今日精神爽利, 為佢做嘅全無白費! |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
