嚇到失魂!

今日波波行先!

如常帶3隻豬仔出去, 明知今日週末外面一定多人, 由屋企出去又要行上一段路, 都唔放波波落車喇, 怕咗佢見到D細路又係度嘈, 抱住就算佢吠起上嚟, 都可以第一時間制止到; 咁工人姐姐推住豆b同達達, 就齊齊出發去散步!

雖然今日係週末, 但無想像中咁多狗狗, 不過行人就好多, 波波對一般路人無咩反應, 所以佢都行得好輕鬆, 兩隻豬女就坐住開蓬車, 喺到遊車河; 以前喺馬路邊我都會落咗個蓬, 不過最近我就選擇開蓬扣帶, 等佢哋唔駛咁焗, 反正限制到佢哋動作唔會太大, 我覺得都幾唔錯; 不過我都嚴守自己原則, 過馬路一定放番低個蓬!!

睇隻豆幾優悠!

波波行得好自在!

因為今日無遇到狗狗, 波波行得自由時我都好自在, 大家無乜壓力咁行咗20分鐘, 就輪到達達!

由姐姐拖住佢行, 我如常同佢哋影吓生活相, 點知行咗一陣, 見到遠處有隻雪橇, 我怕咗波波又撲又跳, 就落番個蓬, 點知當我抬番起頭, 隻雪橇已經衝到埋嚟, 仲喺度聞緊我隻手, 原來佢並無拖帶, 仲要係超級巨大! 
隻大狗並無行開, 好似對佢哋好有興趣,  佢圍住架車氹氹咁轉, 係咁猛聞!

輪到達達豬, 佢真係行得好開心!

可惜今日行咗好短時間, 比隻雪橇破壞晒!

波波喺車裏面又跳又吠, 今次就連豆b都叫埋一份, 可能佢哋都感覺受到威脅, 就用把聲嚟虛張聲勢; 路旁有一對路人夫婦, 都緊張到喺度大嗌! 

好可怕咁大隻狗, 就企喺我隔離, 仲要個大口又開又合, 嚇到我完全唔識反應,  只記得自己擋喺車仔前面, 唔想比佢哋咁接近; 過咗唔知幾耐, 先見到佢個主人, 佢斯斯然咁慢步過黎, 叫隻狗唔好喺度攪攪陣! 
當時真係嬲都唔識, 只想隻狗快D離開, 又怕憤然指責, 個主人會發難, 萬一佢唔拖開隻狗, 我就輸硬, 唯有忍住道氣往前行!

擾攘咗呢輪, 已經驚到無晒興趣, 跟住同對路人夫婦傾咗兩句, 佢哋話唔單祗我哋好驚, 佢哋都驚埋一份, 大家都覺得喺公共地方, 咁大隻狗都唔拖住係太過份, 實在係好自私嘅行為!
我之前見隻西摩, 都全無驚過, 佢有主人拖住, 個樣又無咁兇惡!
無晒mood再喺街行, 豆b今日只可以遊下車河, 同佢哋上番平台, 要坐低定一定神, 今日就連姐姐都話嚇到腳震震兼失咗三魂!

上咗平台, 姐姐講番剛才情況, 真係自己都笑咗出嚟, 原來我真係咁驚D大狗, 養咗狗狗咁耐一直都係無改; 佢話我整個人伏喺車上, 團團轉想遮住佢哋, 口中就不停咁低呼"好驚好驚", 佢就抱住達達藏喺我身後面, 跟住我團團咁轉, 要我做佢嘅擋箭牌!
好彩我落咗個蓬, 佢個頭唔可以伸到入去, 唔係我都唔知點算, 唔知點拖番佢出嚟!

講來講去, 都係嗰句, 請大家拖番狗帶, 呢度唔係寵物公園, 仲要咁大隻狗, 都已經高過我條腰; 今日好彩無事發生, 但無人可以保証, 狗狗受到刺激, 會唔會做出攻擊嘅行為!

寫呢篇日誌時個心都仲卜卜咁跳, 今日真係驚到死咗好多細胞!!
法例規定, 20kg以上狗隻一定要用狗帶，但又無人執法, 違法會嚴例處分, 睇埋呢段post, 真係頭暈, 除咗自求多福, 唯有大家都要醒目, 真係要一眼關七, 唔係隨時可能有血案發生!

http://www.discuss.com.hk/viewthread.php?tid=13262524
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！