今日去街市, 為咗要買雞軟骨比3隻豬仔, 因為波波有骨刺, 又想同3隻豬仔膝關節做多個保養! 曾經睇過某台灣狗狗網站, 推介過呢種食品, 我好同意佢講法, 藥補不如食補, 從食物方面著手保養較為安全妥當.
我睇過幾種做法, 有烘香比狗狗做小食, (我會擔心一不留神佢地會哽親, 由於睇過有芝仔就係食軟骨哽住食道, 手術後昏迷, 最後要人道送別狗狗), 有切碎加洋菜粉做成高湯凍, (我唔係好識洋菜粉呢樣野有乜嘢營養價值, 但雪凍比狗狗, 對腸胃好似唔係咁好)!
仲有一個做法, 我覺得最直接, 最簡單喇, 就係雞軟骨加其他肉類煮湯, 之後將軟骨連湯用攪拌器打成茸, 咁做既唔會哽親D寶貝, 又可以食到食物嘅全部, 真係簡單方便又實際.
反正每星期我都會燉鱷魚肉湯比3隻豬仔, 就加埋雞軟骨落去一齊燉, 既可保養氣管, 又可強化關節, 真係一舉兩得; 湯水燉好後夾起肉肉加上適量蔬菜, 又係一餐膳食喇（我一直無比老火湯豬仔飲, 燉湯都唔會耐, 所以仲保留有肉味同營養), 其他湯渣用攪拌機打成茸, 好方便呢!
結果呢個方法係行唔通嘅, 即使我剪晒雞軟骨D肥膏, 但燉出嚟嘅湯仍然好肥膩, 絕對唔適宜比狗狗飲用, 食太肥膩狗狗容易誘發胰臟炎, 所以方法要稍為調整, 就係將雞軟骨分開蒸熟, 用熱水洗晒D肥油, 先放番落湯度同淮山杞子一齊打碎!
因為豆b氣管唔好, 朋友建議我比鱷魚肉佢食, 我上網search過都有狗狗主人用鱷魚肉煮湯, 幫助有氣喘嘅狗狗.
我都做咗呢個食療湯水比3隻豬仔一段時間喇, 豆b依家氣管只間歇有D嚮聲, 同以前相比真係差好遠; 呢個湯水對有氣管問題嘅狗狗, 係有一定幫助嘅. 如果唔鍾意加雞軟骨, 可以就咁清燉啦, 不過我3隻豬仔就鍾意食加咗料嘅:)
 |
| 鱷魚肉切碎加菜可做一份主餐 用攪拌機將湯同雞軟骨混和後 |
急凍鱷魚肉: 骨膠原含量高, 營養豐富，有大量的蛋白質和身體必需的氨基酸、不飽和脂肪酸、維生素和多種微量元素，但脂肪含量少。鱷魚體內的一種優化核酸，常食可補氣血、壯筋骨、驅濕邪，對咳嗽、哮喘、風濕、貧血、糖尿病等有較好的輔助功效。
淮山: 新鮮嘅名為'山藥', 乾嘅名為淮山, 係狗狗有益食物之一。其營養成份甚為豐富，富含多種身體必需胺基酸、蛋白質及澱粉，另具粘液質、尿囊素、膽鹼、纖維素、維生素A、B1、B2、C、及鈣、磷、鐵、碘等礦物質。
杞子: 有補肝益腎, 明目等嘅功能，可以治療肝腎不足嘅視目不明。杞子有抗氧化功能，可以延緩衰老, 過敏引起嘅眼痕淚多，都可以服用杞子。
雞軟骨: 含豐富膠原蛋白、軟骨素同埋天然葡萄糖胺 , 增加鈣質之餘仲可以有效加強關節及骨骼既健康發展.
 |
| 好乖坐定定等食 |
 |
| 達達總係慢半拍嘅! |
 |
| 好快食清晒喇! |
