今日工人姐姐放假, 要我一個帶3隻豬出去有D難度, 尤其今日係週末, 天氣又好好, 可以預計街上一定好多狗狗, 一諗起波波又會激動, 我就遲疑起嚟!
波波真係令我好尷尬, 完全莫明奇妙都會吠起上嚟, 再係咁以後都唔使同佢入商場喇; 今日陪佢哋一齊晒咗45分鐘, 佢哋當然好舒服啦, 坐住車有我推住佢哋遊來遊去, 又零食又餵水, 但就熱到我跳晒舞!
同佢哋係街上散步嘅時候, 遇到一隻好靚嘅黑金色松松, 身型大細同佢哋差不多, 松松見到3隻豬仔, 好想一齊玩呀, 我抱咗波波出嚟, 比佢哋打個招呼; 主人話隻仔仔3歲, 有時都覺得佢好寂寞; 佢見到我3隻豬仔喺車上騰嚟騰去, 覺得有個伴真係好好, 佢話要考慮吓搵多隻番嚟陪佢仔仔喇!
我哋喺街上傾咗一陣, 惹來好多途人圍埋嚟睇狗狗, 好彩波波又唔吠喎, 之後大家分手時隻黑金仔仲唔肯走, 係咁扯住要走過嚟, 佢個樣好可愛呀, 最衰顧住傾唔記得同佢影番張相啦!
跟住同佢哋上咗平台, 期間波波一直都無再吠喇, 我仲以為今日見多咗人, 有咗改善; 點知後來約朋友見面, 諗住帶埋佢哋見吓朋友, 隻衰豬仔見到人地個BB, 又係咁吠喇, 好彩朋友都有狗狗, 亦認識佢地啫!
唉! 點解波波咁難教架? 究竟隻豬仔嘅行為幾時先會有進步?
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
