今日天氣好潮濕, 不過唔大風又唔凍, 都帶幾隻豬仔出去行街街啦!達達今日行得超好, 完全睇唔出有任何心理障礙, 步履平穩, 上住繩好enjoy咁行咗兩條長街!
豆b一如以往, 佢坐住車輪候時就呱呱叫, 輪到佢行呢就唔肯郁喇, 要一路用小食引誘; 不過佢可能唔鍾意上繩, 要拖住佢就唔肯行; 相反達達無咗條拖帶就好似無咗依靠, 行得唔係幾好喇!
輪到波波行嘅時候, 發生咗一個小意外; 本來佢用easy walk行得好好嘅, 偶然搶繩力度唔會太猛, 佢會識停低; 今日同佢行行吓, 就見到有隻放繩狗狗向佢跑過嚟, 我都預備抱起佢, 但喺嗰一秒間, 佢猛力向前衝, 因為easy walk嘅原理係狗狗衝前好似會被箍住前腳, 佢一時平衡唔到, 就跌低連翻咗幾個跟斗, 我好驚整到佢嘅骨刺嘛, 為咗咁整傷就心痛死我啦!
即刻抱番佢上車, 再上平台比佢哋跑咗一陣; 呢度一定唔會遇見狗狗, 達達對環境又熟識, 豆b唔駛上繩又開心; 往後唯有揀選無人嘅時候, 只逗留唔超過10分鐘啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
