 |
| 沖完涼影張大合照! |
今日同3隻豬仔沖涼, 蜱虱活躍嘅季節, 我會選用8.0死海泥潔毛啫喱, 因為佢注明有14天防牛蜱嘅功效, 雖然証實唔到係咪真係有用, 但心理上就覺得多咗一重保障.
今次只係用喺對twins身上, 達達仍然繼續療程, 都係用番dermagic, 不過3隻豬都有敷扶養泥, 因為用咗呢個效果好明顯, 毛毛係睇得到光滑同明亮咗, 而達達處於呢個咁惡劣嘅時期, 更加唔可以免去呢個保養, 因為佢毛毛已經去到好差嘅程度!
唔知點解, 達達昨日同今日都無便便, 我又開始擔心喇; 老公話睇嚟達達一切都仲好正常, 都唔覺佢有唔舒服; 阿女又話我總係要搵D嘢擔心, 仲笑我做乜要諗到"小事變大事, 大事變災難" 呢套!
其實湊狗狗同湊個BB咪一樣, 佢又唔識講有乜嘢唔妥, 而忍受能耐仲要比人高, 到真係睇到有症狀出嚟, 可能情況都好差喇!
我依稀記得以前睇過一個post, 有隻貓貓都只係4日無便便, 唔知點解後來攪到腸道壞死, 最後要做手術切咗一截腸道; 詳細內容我就唔記得清楚, 但我就記住咗原來無便便後果都可以好嚴重!
老公見我咁擔心, 就提議不如試吓比佢食少少香蕉, 因為人便秘都會有幫助, 反正狗狗唔係唔食得香蕉, 咁試少少都無防啦, 不過食完都係無用. 喺無晒辦法之下, 唯有又上網求助!
睇咗好幾個推荐嘅方法, 有D我唔敢亂做, 我選咗其中兩個比較安全嘅做法, 果然真係幫到達達, 喺呢個零晨時份, 我終於等到佢嘅便便喇, 雖然係又乾又硬, 但總算放下心頭大石啦!
喺呢度同大家分享, 如果狗狗有便秘問題, 都不防一試啊!
1) 開和暖嘅蜜糖水比佢飲.
2) 喺佢下腹肚仔果個位, 用拇指同食指一路由肚臍位沿尿尿位慢慢按壓, 再從佢背脊兩邊同樣用力按壓, 有點像夾的動作一樣, 你會感覺佢的肚仔好實, 而佢就有D反抗嘅反應, 好似俾人喺你條腰”唧”一樣, 再按壓佢腰嘅兩邊, 一路做呢個動作大約十幾二十下. 跟住佢就會有便意, 你呢個動作係刺激佢腸嘅蠕動, 就好似人如果肚唔舒服都會搓揉肚仔一樣。
 |
| 好難先影到波波笑既相片架! |
 |
| 就住角度去影, 達達好似披毛唔算太差! |
 |
| 豆豆毛量比起以前豐厚好多呀! |
 |
| 同場加插達達"肉照", 清楚見到日漸稀疏,睇到晒肉嘅披毛 😖 |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
