腰仔痛痛？

近排天氣真係又熱又焗, 唔敢同佢哋出去行街街喇, 好彩佢哋身型細小, 係屋企都可以夠地方走動!
 

唔知係咪少咗去街, 佢哋精力過盛, 呢幾日見佢哋喺屋企玩耍,都玩得好癲; 波波同豆b係咁追逐, 又同達達撞嚟撞去, 佢仲要猛烈咁將個身體扭動, 喺條隧道鑽嚟鑽去!
我真係怕咗波波, 會整親條腰骨仔, 唔小心觸及條骨刺, 咁就麻煩; 老公就話唔駛擔心, 佢哋會識就住自己, 無可能因咁就唔比佢哋開心嬉戲; 點知話口未完, 真係出事!　

琴日見波波呆吓呆吓, 縮埋一角, 伸手過去, 佢又嚟怕得要死; 用零食引誘, 都唔想接, 又無晒開心表情！　

睇見佢咁嘅反應, 心諗都可能真係整親條腰仔, 感覺痛痛, 唔敢郁動; 試下餵佢食咗止痛藥先, 跟住困佢入籠; 呢個計時炸蛋, 都唔知點保養住先唔會爆, 好怕難逃做手術呢環!

今日一早起身, 去睇吓波波乜嘢情形; 隻豬仔無晒事喇, 不過醫生話過, 食藥要食兩至三日先好停!
除咗靠藥物止痛, 今後一定要對佢有所限制, 再唔比佢玩得激烈; 佢哋根本如同細路哥, 點識就住自己, 話我專制都係咁話, 一切都為求保住佢條腰骨仔!

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！