開始新時段

 天氣太差，連帶3隻豬仔都少咗去街，琴日見無落雨, 夲來都想同佢哋出去行吓，但一落到樓下，感覺好壓迫，連呼吸都唔暢順，根夲唔適合比佢哋散歩，尤其松松氣管一向都唔算良好，我驚要佢哋行行，會導致呼吸困難! 

依家都未踏入炎夏，就咁難搵一個好嘅時間，最慘係唔止悶熱，仲要無風，行喺路上, 完全感覺到地上嘅熱氣直迫上嚟，佢哋狗仔矮細，離地一尺都無，正好吸哂D熱氣，真係中暑都有份! 

我夲來想改喺傍晩時份先出去，但嗰個係黃金時段，有好多狗狗喺路上，當然仲有放繩大狗，對我嚟講係一個極大威脅 ;兼且日前同親友茶聚，講及姐夫為保護自己隻西施小狗，免被隻放繩大狗所傷，竟被嗰隻大狗咬親，嗰個係工人姐姐放狗，見出事仲拉住隻狗急速逃去，可憐我姐夫因怕受到感染，被迫打咗幾枝瘋狗針! 

聽到, 見到甚至遇到嘅都無一樣好，我真係好難放開對放繩狗狗嘅成見，為求自保，唯有避免碰到。

左度右度, 應該係早上出去較好, 不過真係要自己好好調整, 無可能再通宵達旦, 去追趕羊毛氈 :) 

算啦早睡早起, 大家都兩全其美, 等我休息夠本, 追番欠咗嘅睡眠先; 現階段請幾隻豬仔, 喺屋企先歎下冷氣, 下星期開始, 就同佢哋開始新嘅時段!

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！