半年時間過得好快, 轉眼又係3隻豬仔驗血嘅時間, 其實自己心中有數, 睇見佢哋都無乜問題; 不過當然雖要確診, 要一D真實數據, 咁先可以放心落嚟!
波波先入診症室, 隻豬仔一入去就驚到騰騰震, 枝針一插入去佢腳仔度, 佢大力掙扎就甩咗出嚟; H醫生話佢隻腳仔咁就腫咗囉, 咁又試吓抽手仔, 好彩今次順利過渡無問題!
喺等報告其間, 開始同隻豬仔做下檢驗, 聽心, 聽肺, 全身摸吓, check過晒全部都無問題; 醫生話佢體重好標準保養得好好, 如果驗血都無事就算係全部過關!
第二個輪到豆b入去, 我將難度續漸升級; 波波見醫生最多都係驚到震, 唔會好似豆b大聲尖叫咁嚇人! 隻豬女對見醫生好抗拒, 無晒平時咁順得人! 隻豆都係唔合作, 一樣要抽手抽腳, 兩次先ok!
跟住等待期間又係check身體, 其他都無大問題, 但最差嘅comment係佢氣管真係好曳, 如果再咁差落去, 最終都難逃要靠氣管藥幫助....
我養佢已經好小心, 又食鱷魚肉又聞氣, 要再點先可以唔再添加藥物, 我真係唔想佢咁快揹住個藥埕!
最高難度輪到達達豬仔, 佢張牙舞爪見人就反晒白眼, 唔好話要抽血咁高嘅難度, 就算姑娘姐姐幫佢磅重佢都想咬人; 不過隻豬女生得一副甜美嘅樣, 任佢點樣惡死都得人錫, H醫生同姑娘姐姐都比佢迷住, 抱住佢仲笑吟吟!
呢隻豬女好聰明, 每次都係咁識諗, 當比枝針插咗入去, 佢就明白點惡都唔會走得甩身; 所以佢每次抽血都係一take過, 跟住再嚟檢驗就比較順得人!
3隻豬比較起嚟佢關節最壞, 兩隻後腳都輕微移位, 唔怪得佢成日腳震震, 不過H醫生話可以接受, 要唔好跳躍, keep住食supplement!
生毛嘅問題真係無得再諗, 唔會比佢試傷害肝腎嘅藥, 為嘅只係外觀問題! 當然呢樣我絕對認同, 我唔會因為外觀問題傷害佢, 當然希望佢毛毛有所改善, 但無改善都唔會任意惘為!
好快3隻豬仔驗血都有報告, 全部都喺合格範圍, 每次駛呢D錢最開心係乜都唔駛做, 就咁keep住食同等份量嘅藥, 半年後先覆驗唔駛再擔心!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
