 |
| 食完曚曚一齊上床再瞓過! |
習慣每個早上, 餵三隻豬仔食完早餐, 就一齊上床再瞓多陣, 跟住如常同佢哋做例行清潔, 梳毛洗眼等等!
一個早上好快過去, 又係時候為佢哋準備午餐, 今日我準備咗紅菜頭雜菜牛肉加飯, 唔知點解每種同等份量嘅肉類煮熟後都好唔同, 鴨肉同牛肉真係好似無咗一半, 又唔可以加大一倍餵佢哋咁離譜, 始終homemade需要幾多蛋白質, 都有條公式去跟從, 不過見到嗰少少份量又點夠, 咁情形我會加少少白飯, 或者加D燕麥片, 等佢哋唔駛食咗都唔飽咁陰功!
通常無適合佢哋嘅湯水都會煮D南瓜茸, 今日仲有紅菜頭水, 佢哋都好鍾意, 雖然我稀析咗好多倍, 但係佢哋飲咗後D尿尿都幾嚇人, 雖然明知係乜嘢原因, 但見到紅紅嘅尿尿感覺都係唔多好, 不過連唔鍾意飲水嘅達達都搶住飲, 就唯有密D換片片算數!
 |
| 影張相嗟, 兩隻豬都猛催住我! |
 |
| 最鍾意睇佢哋食嘢嘅樣:) |
 |
| 飯後甜品南瓜茸, 兩隻女急住要食! |
 |
| 但願佢哋時時都咁開胃, 快快食清光! |
今日傍晚時候先同兩隻豬仔出去, 都係留低隻豬豆, 呢隻女真係身體麻麻, 開咗冷氣鼻仔會吹波, 唔開冷氣又伸晒脷, 冷熱轉換又喘氣, 佢體質咁敏感都係唔敢同佢出去住, 要先等佢身體適應咗D咁熱嘅天氣!
今日只同佢哋落平台行咗一陣, 好彩無乜人; 佢哋但求去街街,出咗門口就開心晒, 去邊度都無乜所謂, 唔係陌生地方就好安心!
日日如是, 如同過去嘅每一日, 都係過住咁平淡嘅日子, 同幾隻豬仔玩吓, 再唔係做下小手功!
生活唔需要發熱發光, 更唔要驚濤駭浪, 只求安安穩穩, 平凡平淡嘅生活, 就覺得好開心!
 |
| 新唉! 達達豬D毛毛薄到開始見肉喇 T-T |
 |
| 不過今年好彩無影晌到佢嘅情緒, 佢明顯比以前開心咗! |
 |
| 落平台坐吓行吓都好開心! |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
