收到個唔好嘅消息, 姐姐又發現子宮有惡性病變, 早前佢先經歷咗腸道手術, 切除咗D癌細胞; 以為總算安定落嚟, 點知命運又嚟同佢挑戰; 我都唔知講乜嘢好, 但希望佢睇一切會正面, 唔係身處其中, 講當然係好容易, 但唔接受又可以點? 不如積極面對, 好嘅情緒係有好嘅改善!
做人有時會覺得好化學, 好多嘢都不由自己主宰, 好多無可奈何! 呢件事引發我好多體會, 做人真係要放開懷抱, 唔好諗得太多, 有時煩惱要搵起你上嚟, 你躲都無法躲, 如果仲去自尋煩惱, 咁就係自己傻!
本來近日都有D芝蔴六豆嘅小困擾, 又要擔心達達毛毛唔完美, 忽然之間好似開咗竅, 唔再執著於呢D唔係我可控制嘅小事, 唔再自己想當然!
每人頭上一片天, 都係要自己去面對, 要生活得開心抑或痛苦, 好多時都取抉於自己嘅選擇權; 今後我要好好學習生活得正面, 唔好再自尋煩惱, 唔好再想當然! 好好珍惜所有嘅緣份, 我珍愛嘅家人, 朋友, 同寶貝狗狗, 無緣份嘅就由得佢過去, 由得佢隱退於眼前!
今日同3隻豬仔又出去行咗一轉, 落咗場雨涼咗好多, 大家都需要出去透一啖氣, 比自己一D正能量, 我哋要好好生活落去, 好好享受每一天!
今日唔見大型狗狗, 但見到有隻9個月嘅芝女好得意, 佢好活躍咁撩佢哋玩, 波波係咁彈彈跳, 我又怕佢整傷條腰, 達達又高竇到死唔鍾意理狗哋, 最後都係要出動親善大使阿豆b!
今日煲咗靚靚淮山杞子海底椰螺片雞湯, 3隻豬仔都一齊飲, 希望食D新鮮食物, 大家都會健康D; 可以做嘅都盡量做, 其他未知嘅因素, 唔再諗太多囉 :)
 |
| 波波跑得好開心! |
 |
| 達達都行得好寫意! |
 |
| 豆b就幾時都無乜所謂 |
 |
| 豆b充當親善大使 |
 |
| 好香嘅雞湯 |
 |
| 好快飲晒! |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
