做完8隻羊毛氈狗狗, 我嘅小手功並無停落嚟!
有時間就做下佢哋嘅玩具, 都好好玩; 3隻豬嘅玩具我會照住真實版本嚟做, 係彩虹橋嘅狗狗, 年代久遠, D玩具大多無留到落嚟; 只可以單憑記憶同D舊相片, 做住呢D微型玩意, 一路想當年!
bebe同精精, 任我點搜羅記憶, 我都諗唔到佢哋有過玩具, 但記得細時嘅bebe都幾鍾意攪破壞, 佢乜都會拎嚟咬一餐! 後來買咗牛皮骨比佢咬, 我有買過好多牛皮做嘅物品, 有牛皮骨, 牛皮波同牛皮鞋!
安安番嚟嗰日, 就買咗個蕃茄玩具, 日復一日, 佢玩具都越嚟越多; 記得佢咬個軟膠籃球, 咬到"吱吱"叫, 佢最擅長搗蛋, 最叻係將玩具中心嘅發聲部份拔咗出嚟! 最怕佢將呢D小配件吞咗落去, 從此之後, 再唔敢買膠制玩具!
3寶番嚟, 唔係隻隻都愛玩具, 精精乜都無興趣玩, 佢只鍾意自己一個縮喺檯底; 叻叻就同達達豬一樣, 唔係太鍾意玩具, 但又唔會抗拒, 有時都會咬住玩吓, 又放低!
樂樂細時係最可愛, 佢好活潑, 性格又樂天, 最愛追住個波走嚟走去, 最鍾意睇佢走起上嚟, 嗰一身毛毛飄揚; 真係好想永遠留住嗰刻, 永遠唔要忘記!
諗番佢最後嘅日子, 真係好心翳, 一個伴侶離去, 令佢對乜都無晒興趣, 叻叻走咗, 諗唔到竟帶走佢嘅一切; 唯一係見到球類, 佢仲想追, 可惜事與願為, 佢已垂垂老去, 連行步路都咁吃力, 仲點去追?
好記得波波番嚟, 我有買過球類, 但見樂樂好激動, 佢想起身跑過去, 點知佢已無能力, 只係碌咗出嚟!
我哋何其殘忍, 竟做咗件咁嘅事, 從此喺樂樂面前, 永遠唔會再出現任何一個波!
一路做小手功, 一路回味; 甜, 酸, 苦, 澀都一齊嚟!
只有做3豬嘅玩具先最寫意, 可以笑住嚟做, 壓力全無; 做好咗同個真實版本做個比拼, 係一個好好方式去舒緩壓力!
 |
| 左起: 豆豆, 達達, 波波 |
 |
| 左起: 叻叻,樂樂, 精精 |
 |
| 左起: 安安, bebe |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
