 |
| 沖乾淨涼, 好爽 :) |
今日又同3隻豬仔沖涼, 順便修下毛毛; 我有自知之明, 唔係高手, 都只係想修短少少, 好等佢哋唔駛咁熱; 豆b一向係軟骨功嘅始祖, 估唔到波波都學埋呢招死蛇爛鱔, 兩隻豬係都唔肯企好, 一味爬低係度; 攪到我無從入手, 都唔知要點先剪到, 最乖係達達豬仔, 佢好乖咁企定定任我舞!
可惜佢嗰身毛毛, 都剪無可剪囉, 睇住日復一日, 佢毛毛越嚟越少, 真係感覺無助; 睇住咁嘅情形, 又乜都幫唔到, 好想知係咪真係有人可以瀟洒面對, 欣然接受? 還是好似我咁, 接受得無可奈何!
每次同佢梳毛, 都同自己講, 難得佢身心愉快, 比起果D有病嘅狗狗, 已經好好多! 只有係咁睇呢個問題, 先會感受好過, 講真面對每一件事, 要你眼睜睜咁睇住日漸衰落, 但又束手無策, 嗰種感覺, 唔係身處其中, 體會有幾多?
次次同佢哋洗完白白, 佢哋都好似攰過我, 等佢哋快D食完晚餐, 再嚟過餐後甜品! 今日又整鮮芒果乳酪, 佢哋食完之後, 好滿足咁好快齊齊瞓著咗囉!
 |
| 豆b又食到反碟喇, 呢隻豬講到食哩, 成日都咁緊張嘅! |
