POM POM 豬樂園(My little pomeranians): 咬狗事件

咁美好嘅夜晚, 一落街就被破壞 :(

今晚同波波落街行, 終於都遇到最唔想遇到嘅事, 好彩有驚無險, 但真係好鬼煩!

今日同佢哋驗完血, 無諗住同佢哋去行街, 咁啱有D事要出去, 就帶埋波波一齊行; 拖住波波慢慢行, 又遇著天氣涼涼哋, 本來真係好舒服, 但竟然遇到有麻煩!

我哋一路行緊都好平靜, 離遠見到有隻大狗放咗繩, 我好機警咁將波波抱番; 諗住咁應該好安全, 點知咁都會出事, 隻大狗見到我地癲咗咁, 係咁向住我哋衝埋嚟; 我抱住波波左閃右避都避唔開, 波波就係咁大聲吠, 隻狗見波波吠就猛撲高, 佢越撲高波波又越吠!

隻狗係咁又跳又撲我點都避唔開, 諗起剛喺facebook又睇到有咬狗嘅事件, 唯有雙手伸直將波波盡量舉起, 我真係唔好彩咁都撞到正!
嗰個主人真係唔識做, 見到隻狗直情攬住我, 都只係大聲咁叫佢番嚟, 擾攘咗成幾分鐘, 真係要咬都已經比佢咬死囉, 見隻狗狗都唔理佢, 又見街上有個男人向住我走過嚟, 咁先快快向前走, 一路拖狗一路同我講對唔住!

我其實都好驚, 有D唔識反應, 抱住波波往前走, 決定以後晚上唔再出嚟; 行遠之後回頭望, 見隻狗比個主人打緊, 其實根本係個主人嘅問題; 唔理隻狗係貪玩, 抑或係有攻擊性, 咁大隻狗就算係撩玩, 都唔係人人會受落, 起碼我就不恭維! 我唔信隻狗係第一次, 向住其他狗亂咁撲, 根本知自己嘅狗咁容易激動, 就應該早作準備咪比佢亂嚟;仲要咁大隻狗狗好容易會攪出事嘛, 今晚好彩無比佢咬到, 但都比佢嚇餐飽啦!

都唔知要點先可以教育D人唔好亂放繩, 呢D地方係唔適合狗狗自由行; 為己為人拖番繩, 大家都會和諧D!

比狗咬事件(1) -轉貼自facebook May 10

章魚大雄
分享D事比大家知,今日下午四點鐘帶左栗子去左荃灣狗公園玩(因為約左人交收D野)~~~咁公園本身都有2隻細狗係到玩緊,係狗公會玩到大約玩到四點半有個三十幾歲既男人帶左兩隻吏立莎入黎,果兩隻狗一入黎就周圍吠,係咁追D細狗,我見到已經覺得有問題,馬上抱起栗子係大脾,唔比栗子落地,其中一隻吏立莎見到就衝過黎,我馬上推開隻吏立莎,果隻狗立即停左係到,但個主人就好似見怪不怪咁慢慢行過黎~~~隔左陣有個女人帶左兩隻松鼠狗入黎,果兩隻吏立莎好似顛左咁跑過去人地到係咁吠,個女主人都已經好驚,馬上用狗帶拉高,希望可以抱起自己D狗狗,但都唔夠快手,其中有隻松鼠狗已經比隻吏立沙哎到大脾,仲要係兩隻狗(松鼠同吏立沙都已經吊起左)個吏立莎主人先拉返自己果兩隻狗,當時我已經抱住栗子跑到去案發現場,個松鼠狗女主人都已經鬧緊個吏立莎主人,跟住走左,見到咁情況我都馬上抱栗子返狗袋走人~~~~大家如果帶狗狗出去時記得留意多D其他狗,要小心~~~

比狗咬事件(2) - 轉貼自facebook May 12

　kwok meion's Photos

今日發生既事我想借此地方提醒各位,今早11點我地帶左肥熊同妹豬去南生圍玩,個多小時後,我地去左有橋行入去果間成記食完野,我手拖住熊仔條狗繩帶住佢行,衣架在我背後用車車推住妹豬慢慢大家一齊行番出黎,去到路口有另一間士多,(果間士多就係坐完橫水渡直行入去準備轉左入南生圍果個路口),就係行到果度,電光火石間衝出一隻好大既淺米黃色唐狗,冇任何警號就向住肥熊咬落去,我第一反應就係拉起條狗繩將肥熊抱上身,雖然只係幾秒鐘時間發生既事,但抱起肥熊佢竟然掙扎慘叫,一望之下已經見有傷口爆開,當時士多兩男女見倒當無事發生,男既仲施施然行左去,女既番入裡面唔出黎,我惟有大聲問佢隻狗有冇打過預防針?話佢知隻狗咬倒肥熊,佢答我隻狗只係流浪狗,佢好心收留佢,唔理得咁多野,仲叫我call漁記!我當時冇再同佢爭論,拿拿聲call醫生番黎救熊仔,20分鐘已到達診所,醫生檢查完話我知好好彩,如果咬上小小係心臟位置,會救唔番!而家聽心臟同肺都正常,要即時驗血做手術打開睇入面有冇咬倒其他內臟同清晒d膿,否則驚會有細菌,發炎同有併發症!熊仔今次算大命,大步攬過!

我心愛既肥熊遇到件咁既事!我唔止心痛肉赤而且好憤怒!!本來我打個電話去漁記好容易,亦有朋友叫我咁做,否則第日可能有更多去果度玩既狗狗遇害,但我諗...!!打呢個電話唔止係捉左咬肥熊隻狗去死咁簡單,入面仲有好多佢地既同伴會被捉,咁係咪要咁多條命去賠償肥熊今次既意外呢?而事實上最該死既係士多果兩個人,而唔係隻狗,如果佢肯同隻狗帶上口罩,唔好任意俾佢出黎橫行,意外又點會發生?所以最後我選擇放隻狗一條生路,唔打呢個電話,就當肥熊前世欠左隻狗,如今要還佢一口,但為免慘劇再發生,所以我將件事講晒出黎,希望狗主們知道,一係唔好再去南生圍,一係就途經果個士多路口都要抱起自己d寶貝,入到裡面先好放低繼續行!因為唔知幾時佢又會衝出黎!仲有係千祈唔好唔拖繩,如果肥熊係冇拖繩既話,我根本拉唔倒佢上身上抱,會眼白白睇住佢俾狗亂咬而死都救唔倒!我真係唔願聽見有第隻狗狗有此遭遇,請大家留意啊!比狗咬事件(3) - 轉貼自本地一本最新一期嘅寵物雜誌