近日真係黑仔, 好似事事都唔順利!
最最麻煩嘅係牙痛!! 呢隻牙補咗未夠一年, 本來都好好哋, 半年前去洗牙, 牙醫檢查過口腔都無話有事, 無啦啦呢幾日痛到要死! 我真係好怕再去見牙醫, 講真補咗嘅牙再發生咁事, 都難逃兩種方法, 唔係將隻牙拔去, 就係將牙根杜死!
天啊! 兩種方法我都怕得要死, 拔牙顧然唔好, 無咗隻牙, 但呢樣都唔係我最怕怕, 一諗到滿口鮮血, 我就成個軟咗落嚟!
如果要杜牙根, 一樣咁死, 又要鑽孔, 好似鑽羅絲咁鑽到落底, 仲要吉針, 我諗吓都無晒勇氣, 都係食住止痛藥先, 比D時間等我透吓氣!
牙痛真係令人無晒心機, 但仲要有心理準備, 我都知逃唔開坐上牙醫嗰張寶座嘅呢一劫, 唉! 真係有如要上斷頭臺 :(
自己已經好煩, 波波又嚟痾爛, 琴日好好哋, 照常食完早餐去便便, 頭半段都係正常便便, 尾果D竟然係水狀, 仲混有血絲.
唉! 又發生咩事呀? 中午即刻禁食, 等佢腸胃透番陣先啦!
幸好一直都無異常嘅狀況出現, 佢其他一切都算正常; 到咗晚上我比少少南瓜雞肉飯佢食, 到咗今朝一樣咁食, 佢便便就正常番!
好多狗主都話呢個餐單對痾軟便好有效, 估唔到又真係work喎, 真係上天見憐唔好要我再煩多樣, 等我集中勇氣去受死, 一於下星期去見牙醫啦!
本來天氣好好應該同佢哋出去行番一轉, 但真係無乜心機, 三隻豬唯有再喺屋企互相嬉戲, 呢個係養一隻狗狗唔會得到嘅便利 :)
 |
| 波波梗係上我張床休息啦! |
 |
| 達達幾時先有勇氣由床仔踏晒D腳仔出嚟? |
 |
| 豆b keep住每晚聞氣暫時touch wood 啦! |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
